Kadem Project Releases 700 Cusecs: నిర్మల్ జిల్లా రైతుల ఆందోళన ఫలించింది. జన్నారం, దస్తురాబాద్ మండలాల్లోని చివరి ఆయకట్టు భూములకు సాగునీరు అందించేందుకు కడెం ప్రాజెక్టు నుంచి అధికారులు 700 క్యూసెక్కుల నీటిని విడుదల చేశారు. ఇటీవల ఈ రెండు మండలాలకు చెందిన రైతులు తమ పంట పొలాలకు నీరు అందించాలని కోరుతూ ఆందోళన చేపట్టారు. రైతుల విజ్ఞప్తి, ఆందోళనలను పరిగణనలోకి తీసుకున్న అధికారులు నీటి విడుదలకు నిర్ణయం తీసుకున్నారు.
కడెం ప్రాజెక్టు నుంచి నీటిని విడుదల చేయడంపై ఖానాపూర్ ఎమ్మెల్యే వెడ్మ బొజ్జు పటేల్ ప్రకటన చేశారు. ఈ విషయంపై జిల్లా ఇన్‌చార్జి మంత్రి జూపల్లి కృష్ణారావు, నీటిపారుదల శాఖ మంత్రి ఉత్తమ్ కుమార్ రెడ్డితో మాట్లాడినట్లు ఆయన తెలిపారు. మంత్రులను సంప్రదించిన అనంతరం జన్నారం, దస్తురాబాద్ మండలాల రైతుల పంట పొలాలకు నీరు అందించేందుకు 700 క్యూసెక్కుల నీటిని విడుదల చేస్తున్నట్లు వెల్లడించారు. ఇక రైతులు ఆందోళన చెందాల్సిన అవసరం లేదని ఎమ్మెల్యే భరోసా ఇచ్చారు. రైతుల ప్రయోజనాలే తమకు ముఖ్యమని, చివరి ఆయకట్టు వరకు సాగునీరు అందించేందుకు కృషి చేస్తామని పేర్కొన్నారు. కడెం ప్రాజెక్టు నుంచి నీటి విడుదలతో జన్నారం, దస్తురాబాద్ మండలాల రైతులకు ఊరట లభించనుంది.