జనసేన పార్టీ అధినేత పవన్ కళ్యాణ్ మంగళగిరిలోని పార్టీ కేంద్ర కార్యాలయం వేదికగా వివిధ స్థానిక సంస్థల మేయర్, చైర్మన్ స్థానాలకు పోటీ చేసే అభ్యర్థుల పేర్లను అధికారికంగా ఖరారు చేశారు. ఇందులో భాగంగా రెండు మేయర్, మూడు చైర్మన్ స్థానాలకు అభ్యర‍్ధులను ప్రకటించారు.
శ్రీకాకుళం కార్పొరేషన్ మేయర్ అభ్యర్థిగా డాక్టర్ దానేటి రాధా రాణిని ఎంపిక చేయగా, కాకినాడ మేయర్ స్థానానికి శ్రీమతి ఆకుల భవానిని అభ్యర్థిగా ప్రకటించారు. అలాగే రాజాం చైర్‌పర్సన్‌గా శ్రీమతి బనిశెట్టి సౌజన్య లత, భీమవరం చైర్‌పర్సన్ అభ్యర్థిగా డాక్టర్ చుండూరి మల్లేశ్వరి పేర్లతో పాటు తాడేపల్లిగూడెం చైర్మన్‌గా శ్రీ పాలూరు వెంకటేశ్వర రావు పేర్లను జనసేన పార్టీ అధికారికంగా వెల్లడించింది.
ఈ ప్రకటనతో ఆయా ప్రాంతాల్లో పార్టీ శ్రేణులు, అభ్యర్థుల్లో ఉత్సాహం నెలకొంది. రాబోయే ఎన్నికల్లో ఈ అభ్యర్థుల గెలుపే లక్ష్యంగా పార్టీ నేతలు సమన్వయంతో ముందుకు సాగాలని నిర్ణయించారు. స్థానిక సంస్థల ఎన్నికల పోరులో విజయం సాధించడమే ధ్యేయంగా జనసేన అధిష్టానం ఈ అభ్యర్థుల ఎంపికను వ్యూహాత్మకంగా పూర్తి చేసింది.
పార్టీ బలోపేతానికి, ప్రజలకు మరింత చేరువ కావడానికి ఈ పదవుల కేటాయింపు ఎంతో దోహదపడుతుందని పార్టీ వర్గాలు భావిస్తున్నాయి. ఖరారైన అభ్యర్థులు అందరూ తమ ప్రాంతాల్లోని ప్రజల సమస్యల పరిష్కారం కోసం, అభివృద్ధి కార్యక్రమాల వేగవంతం కోసం కృషి చేయాలని పార్టీ అధినేత దిశానిర్దేశం చేశారు. ఎన్నికల సమయానికి తగినట్లుగా ప్రణాళికలు రూపొందించుకుని ముందుకు వెళ్లాలని నేతలకు సూచించారు.