Vaibhav Sooryavanshi: వైభవ్‌కు మళ్లీ నిరాశ.. టీమిండియాలోకి ఇద్దరు కొత్త ప్లేయర్స్ ఎంట్రీ..

ఐర్లాండ్‌తో జరుగుతున్న రెండో టీ20 మ్యాచ్‌లో టాస్ గెలిచిన భారత జట్టు కెప్టెన్ శ్రేయస్ అయ్యర్ మొదటగా బౌలింగ్ ఎంచుకున్నాడు. సిరీస్ ఆశలను సజీవంగా ఉంచుకోవాలంటే కచ్చితంగా గెలవాల్సిన ఈ మ్యాచ్‌లో భారత తుది జట్టులో రెండు కీలక మార్పులు చేసినట్లు కెప్టెన్ శ్రేయాస్ అయ్యర్ ప్రకటించాడు. అయితే, ఈ మ్యాచ్‌లో అందరి దృష్టి ఆకర్షించిన ముఖ్యమైన విషయం ఏమిటంటే.. ఎన్నో అంచనాలతో జట్టులోకి వచ్చిన యువ సంచలనం వైభవ్ సూర్యవంశీకి నిరాశే ఎదురైంది. అతనికి ఈ మ్యాచ్ తుది జట్టులో చోటు దక్కలేదు.

టీమిండియా భవిష్యత్తు స్టార్‌గా భావిస్తున్న సూర్యవంశీని ఈ మ్యాచ్‌లో ఆడిస్తారని అభిమానులు ఆశించినప్పటికీ, జట్టు సమీకరణాల దృష్ట్యా యాజమాన్యం అతడిని పక్కనబెట్టాల్సి వచ్చింది. మొదటి మ్యాచ్‌లో బ్యాటింగ్ వైఫల్యం తర్వాత ఈ మ్యాచ్‌లో సూర్యవంశీ లాంటి హిట్టర్ జట్టుకు ప్లస్ అవుతాడని భావించినా, తుది జట్టులో చోటు దక్కకపోవడం అతడి అభిమానులను కొంత నిరాశకు గురిచేసింది.

మరోవైపు, దేశవాళీ క్రికెట్ మరియు ఐపీఎల్‌లో అద్భుత ప్రదర్శనతో అదరగొట్టిన విధ్వంసకర బ్యాటర్ సూర్యాన్ష్ షెడ్గే ఈ మ్యాచ్‌తో అంతర్జాతీయ క్రికెట్‌లోకి అరంగేట్రం చేస్తున్నాడు. భారత్ ఏ-టూర్లలో నిలకడగా రాణించడంతో పాటు ఐపీఎల్‌లో కూడా సత్తా చాటడంతో సూర్యాన్ష్‌కు ఈ సువర్ణ అవకాశం దక్కింది. సూర్యాన్ష్‌తో పాటు యువ ఆల్‌రౌండర్ ప్రిన్స్ యాదవ్ కూడా ఈ మ్యాచ్ ద్వారా భారత క్యాప్‌ను అందుకుని అరంగేట్రం చేస్తున్నాడు.

మొదటి మ్యాచ్‌లో ఎదురైన షాకింగ్ ఓటమి నుంచి కోలుకుని, ఐర్లాండ్ విధించిన సవాలును తిప్పికొట్టేందుకు భారత్ ఈ మార్పులతో బరిలోకి దిగుతోంది. మొదట బౌలింగ్ చేస్తూ ఐర్లాండ్‌ను తక్కువ పరుగులకే నియంత్రించాలని, ఆపై సూర్యాన్ష్ లాంటి యువ ఆటగాళ్ల సాయంతో సిరీస్‌ను 1-1తో సమం చేయాలని టీమిండియా పట్టుదలగా ఉంది. భవిష్యత్తు ప్రణాళికల్లో భాగంగా యువ రక్తాన్ని ప్రోత్సహిస్తున్నప్పటికీ, సూర్యవంశీకి చోటు దక్కకపోవడం ఈ మ్యాచ్‌ టాస్ సమయానికి సంబంధించిన అతిపెద్ద ముఖ్యాంశంగా మారింది.