స్వదేశంలో జరిగిన హాకీ వరల్డ్‌కప్‌లో భారత జట్టు ఘోరంగా విఫలమైంది. ఫ్యాన్స్ ఆశలపై నీళ్లు చల్లుతూ కనీసం క్వార్టర్స్‌ చేరకుండానే ఇంటిముఖం పట్టింది. ఏకంగా తొమ్మిదో స్థానంతో సరిపెట్టుకుని నిరాశపర్చింది. దీనికి పూర్తి బాధ్యత వహిస్తూ ఇండియన్ హాకీ టీమ్ కోచ్‌గా ఉన్న గ్రహమ్ రీడ్.. ఈ టోర్నీ ముగిసిన మరుసటి రోజే తన పదవికి రాజీనామా చేశాడు. అతనితోపాటు ఎనలిటికల్ కోచ్‌గా ఉన్న గ్రెగ్ క్లార్క్, సైంటిఫిక్ అడ్వైజర్ మిచెల్ డేవిడ్ కూడా తమ పదవుల నుంచి తప్పుకొన్నారు. ఈ వరల్డ్ కప్‌లో జర్మనీ విజేతగా నిలిచిన విషయం తెలిసిందే. ఆదివారం (జనవరి 29) జరిగిన ఫైనల్లో బెల్జియంపై పెనాల్టీ షూటౌట్లో జర్మనీ విజయం సాధించింది.
Murali Vijay: క్రికెట్‌కు మురళీ విజయ్ గుడ్‌బై.. అన్ని ఫార్మాట్ల నుంచి రిటైర్
గ్రూప్ స్టేజ్ ముగిసిన తర్వాత ఇండియా పూల్-డిలో ఇంగ్లాండ్ తర్వాత రెండో స్థానంలో నిలిచింది. ఈ గ్రుప్ నుంచి క్వార్టర్ ఫైనల్ చేరడానికి క్రాస్ ఓవర్ మ్యాచ్ ఆడింది. అయితే న్యూజిలాండ్‌తో జరిగిన ఆ మ్యాచ్‌లో ఓడిపోయి ఇంటిదారి పట్టింది. ఒక దశలో 3-1తో ఆధిక్యంలో ఉన్నా చివరికి కివీస్‌కు స్కోరు సమం చేసే అవకాశం ఇవ్వడం, పెనాల్టీ షూటౌట్లో చేతులెత్తేయడంతో ఓటమి తప్పలేదు. అయితే వరల్డ్ కప్‌లో విఫలమైనా కోచ్ గ్రహమ్ రీడ్ ఆధ్వర్యంలో ఇండియన్ టీమ్ 2021లో జరిగిన టోక్యో ఒలింపిక్స్‌లో బ్రాంజ్ మెడల్ సాధించింది. నాలుగు దశాబ్దాల తర్వాత ఒలింపిక్స్‌లో ఇండియన్ టీమ్ గెలిచిన తొలి మెడల్ ఇదే కావడం విశేషం.ఇక 2022 కామన్వెల్త్ గేమ్స్‌లోనూ సిల్వర్ మెడల్ గెలుచుకుంది. 2021-22 ఎఫ్ఐహెచ్ హాకీ ప్రో లీగ్ సీజన్ లో ఇండియన్ టీమ్ మూడోస్థానంలో ఉంది. 2019లో గ్రహమ్ రీడ్ ఇండియన్ టీమ్ కోచ్‌గా బాధ్యతలు చేపట్టాడు. టీమ్, హాకీ ఇండియాతో కలిసి ఇన్నేళ్లు పని చేయడం గర్వకారణంగా భావిస్తున్నట్లు తన రాజీనామా సందర్భంగా రీడ్ పేర్కొన్నాడు.
AP Three Capitals: మూడు రాజధానులపై రేపు విచారణ.. సుప్రీంకోర్టు తీర్పుపై ఉత్కంఠ