Gold Keep In House: ఇంట్లో బంగారం, వెండి ఎంత ఉండాలో తెలుసా.. ఇవిగో రూల్స్..

ఇంట్లో ఎంత బంగారం, వెండి ఉంచుకోవాలనే దానిపై ఆదాయపు పన్ను శాఖ కొన్ని నిబంధనలను నిర్దేశించింది. సీబీడీటీ (CBDT) సూచనల ప్రకారం.. ఇంట్లో లేదా బ్యాంకు లాకర్‌లో బంగారం ఉంచుకోవడానికి చట్టపరమైన గరిష్ట పరిమితి అంటూ ఏదీ లేదు. అయితే.. ఆదాయపు పన్ను సోదాల సమయంలో అధికారులు జప్తు చేయకుండా ఉండేందుకు కొన్ని పరిమితులను నిర్ణయించారు. దీని ప్రకారం వివాహిత మహిళలు గరిష్టంగా 500 గ్రాములు, అవివాహిత మహిళలు 250 గ్రాములు, పురుషులు 100 గ్రాముల వరకు బంగారు ఆభరణాలను ఎలాంటి ప్రశ్నలు లేకుండా ఉంచుకోవచ్చు. అయితే.. ఈ పరిమితి కేవలం ఆభరణాలకు మాత్రమే వర్తిస్తుంది.

వెండి విషయానికి వస్తే.. సీబీడీటీ మార్గదర్శకాలలో వెండికి సంబంధించి నిర్దిష్టమైన గ్రాములు లేదా కిలోల పరిమితి ఏదీ స్పష్టంగా పేర్కొనబడలేదు. అయినప్పటికీ.. ఇంట్లో అత్యధిక మొత్తంలో వెండి లేదా బంగారం ఉంటే, వాటిని కొనుగోలు చేయడానికి దారితీసిన వనరుల గురించి అంటే ఆదాయ వనరులు, వారసత్వంగా లేదా పెళ్లిలో కానుకలుగా వచ్చినవి సరైన ఆధారాలు చూపించాల్సి ఉంటుంది.

పెళ్లిలో వచ్చిన కానుకలు, కుటుంబం ద్వారా సంక్రమించిన ఆభరణాలు, లేదా చట్టబద్ధమైన సంపాదనతో కొనుగోలు చేసినట్లు తగిన రికార్డులు లేదా బిల్లులు ఉంటే ఎంత పరిమాణంలోనైనా బంగారం లేదా వెండిని ఇంట్లో ఉంచుకోవడానికి ఎలాంటి చట్టపరమైన ఇబ్బంది ఉండదు.