IMD October 2026 Forecast: తెలంగాణకు IMD బిగ్ అలర్ట్.. అక్టోబర్‌లోనూ వర్షాలు లేనట్టే..!

IMD October 2026 Forecast: భారత వాతావరణ శాఖ (IMD) అక్టోబర్ నెల వాతావరణ అంచనాలను (ఆవుట్‌లుక్) విడుదల చేసింది. ఈ అంచనాల ప్రకారం ఈ ఏడాది అక్టోబర్‌లోనూ వర్ష సూచనలు పెద్దగా లేవు. దీనివల్ల సాధారణంగా చల్లబడాల్సిన అక్టోబర్ నెల ఈసారి ఎండకాలాన్ని తలపించే అవకాశముందని వాతావరణ శాఖ తెలిపింది. సముద్రాల్లో తలెత్తుతున్న మార్పుల వల్లే ఈ పరిస్థితి ఏర్పడుతోంది. ప్రస్తుతం భూమధ్యరేఖా పసిఫిక్ మహాసముద్రంపై బలమైన ఎల్ నినో (El Niño) పరిస్థితులు నెలకొన్నాయి. ఈ ఎల్ నినో పరిస్థితులు ఈ సంవత్సరాంతం వరకు మరింత బలపడే అవకాశం ఉందని అధికారులు తెలిపారు. మరోవైపు, హిందూ మహాసముద్రంపై ప్రస్తుతం తటస్థ ఐఓడీ (Indian Ocean Dipole – IOD) పరిస్థితులు ఉన్నాయని, రాబోయే ఈశాన్య రుతుపవనాల కాలంలో కూడా ఇవే పరిస్థితులు కొనసాగే అవకాశం ఉందని వెల్లడించారు.

ఈ సముద్ర వాతావరణ పరిస్థితుల ప్రభావంతో తెలంగాణ రాష్ట్రంలో అక్టోబర్ నెలలో సాధారణం కంటే తక్కువ వర్షపాతం నమోదయ్యే అవకాశం ఉంది. అంతేకాకుండా అక్టోబర్ నుంచి డిసెంబర్ వరకు కొనసాగే శీతాకాలం ప్రారంభ సీజన్‌లో కూడా మొత్తం వర్షపాతం సాధారణం కంటే తక్కువగానే ఉండవచ్చని తెలిపింది. ఇక ఉష్ణోగ్రతల విషయానికొస్తే, ఈ నెలలో తెలంగాణ వ్యాప్తంగా గరిష్ట, కనిష్ట ఉష్ణోగ్రతలు సాధారణ స్థాయి కంటే ఎక్కువగా నమోదై తీవ్రమైన వేడి వాతావరణం నెలకొనే అవకాశం ఉందని ఐఎండీ స్పష్టం చేసింది.