Hyderabad: అమీర్‌పేట్‌లో భారీ అగ్ని ప్రమాదం.. పెద్ద ఎత్తున ఎగిసిపడుతున్న మంటలు

Hyderabad: హైదరాబాద్‌లోని అమీర్‌పేట్ ప్రాంతంలో భారీ అగ్ని ప్రమాదం చోటుచేసుకుంది. మైత్రివనం ఎదురుగా ఉన్న కేఎస్‌ఆర్ ఫ్యాషన్స్ భవనంలో ఒక్కసారిగా మంటలు చెలరేగడంతో పరిసర ప్రాంతాల్లో భయాందోళనలు నెలకొన్నాయి. భవనం నుంచి ఎగిసిపడిన అగ్నికీలలు వేగంగా వ్యాపించడంతో సమీపంలోని దుకాణాలకు సైతం మంటలు అంటుకున్నాయి. మంటలు క్రమంగా విస్తరిస్తుండటంతో స్థానిక వ్యాపారులు, ప్రజలు ఆందోళనకు గురయ్యారు. ఈ అంశంపై సమాచారం అందుకున్న అగ్నిమాపక సిబ్బంది వెంటనే ఘటనా స్థలానికి చేరుకుని ఫైర్ ఇంజిన్ల సహాయంతో మంటలను అదుపు చేసేందుకు ప్రయత్నిస్తున్నారు. ప్రమాద తీవ్రతను దృష్టిలో ఉంచుకుని పోలీసులు సైతం సహాయక చర్యల్లో పాల్గొంటున్నారు. అగ్ని ప్రమాదం కారణంగా ఆ ప్రాంతంలో కొంతసేపు రద్దీ నెలకొనగా, ప్రజలను సురక్షిత ప్రాంతాలకు తరలించే చర్యలు చేపట్టారు. ప్రమాదంలో ఎవరైనా గాయపడ్డారా లేదా అనే వివరాలు ఇంకా తెలియరాలేదు. అగ్ని ప్రమాదానికి గల కారణాలు ప్రస్తుతం తెలియరాలేదు. మంటలు పూర్తిగా అదుపులోకి వచ్చిన అనంతరం అగ్నిప్రమాదానికి కారణాలపై అధికారులు దర్యాప్తు చేపట్టనున్నారు.