Axar Patel: టీ20ల్లో జీరో.. వన్డేల్లో హీరో.. మార్పుకు కారణం ఏంటో చెప్పిన అక్షర్ పటేల్..

ఇంగ్లాండ్‌తో జరిగిన మొదటి వన్డే మ్యాచ్‌లో టీమిండియా ఘనవిజయం సాధించడంలో ఆల్‌రౌండర్ అక్షర్ పటేల్ కీలక పాత్ర పోషించారు. అయితే.. దీనికి కొన్ని రోజుల ముందు జరిగిన టీ20 సిరీస్‌లో మాత్రం ఆయన ఘోరంగా విఫలమయ్యారు. కేవలం 19 పరుగులు మాత్రమే చేసి తీవ్ర విమర్శలు ఎదుర్కొన్నారు. కొద్దిరోజుల క్రితం వరకు జీరోలా కనిపించిన ఆటగాడు, వన్డే మ్యాచ్ ముగిసేసరికి ఒక్కసారిగా హీరోగా ఎలా మారారనే ప్రశ్న అందరిలోనూ మెదిలింది. దీనికి స్వయంగా అక్షర్ పటేలే మ్యాచ్ అనంతరం సమాధానమిచ్చారు.

టీ20 సిరీస్ సమయంలో తాను బంతిని గట్టిగా బాదడానికే ఎక్కువ ప్రాధాన్యత ఇచ్చానని, ఆ క్రమంలో తన సహజసిద్ధమైన టైమింగ్‌ను కోల్పోయానని అక్షర్ అంగీకరించారు. ముఖ్యంగా డెత్ ఓవర్లలో బ్యాటింగ్‌కు వచ్చినప్పుడు పెద్ద షాట్లు ఆడాలనే ఒత్తిడి వల్ల తన లయ దెబ్బతిన్నట్లు చెప్పారు. అయితే.. వన్డే ఫార్మాట్‌కు వచ్చేసరికి తన వ్యూహాన్ని పూర్తిగా మార్చుకున్నట్లు తెలిపారు. వన్డేల్లో క్రీజులో నిలదొక్కుకోవడానికి తగినంత సమయం ఉంటుందని, అందుకే బంతిని బలంగా కొట్టడం కంటే సరైన టైమింగ్‌తో షాట్లు ఆడటంపైనే ఎక్కువ దృష్టి పెట్టానని వివరించారు.

ఇలాంటి పిచ్‌లపై వచ్చిన వెంటనే భారీ షాట్లు ఆడటం కష్టమని, మొదట పిచ్ పరిస్థితులను అర్థం చేసుకుని క్రీజులో కొంత సమయం గడపడం చాలా ముఖ్యమని అక్షర్ పేర్కొన్నారు. తనపై తాను నమ్మకం ఉంచి, ప్రణాళికలను సరిగ్గా అమలు చేయడం వల్లే ఈ విజయం సాధ్యమైందన్నారు. ఈ మ్యాచ్‌లో అక్షర్ పటేల్ 9.5 ఓవర్లలో 4 వికెట్లు పడగొట్టడమే కాకుండా, బ్యాటింగ్‌లో 52 బంతుల్లో 5 ఫోర్లు, 1 సిక్సర్‌తో అజేయంగా 57 పరుగులు చేసి ఆల్‌రౌండ్ ప్రదర్శనతో ‘ప్లేయర్ ఆఫ్ ది మ్యాచ్’ అవార్డును అందుకున్నారు. కెప్టెన్ శుభ్‌మన్ గిల్ (80), వాషింగ్టన్ సుందర్ (52)ల మద్దతుతో భారత్ 259 పరుగుల లక్ష్యాన్ని మరో 28 బంతులు మిగిలి ఉండగానే ఛేదించింది.