ఆనర్ (Honor) కంపెనీ కొత్తగా Honor X6e స్మార్ట్ఫోన్ను గ్లోబల్ మార్కెట్లో విడుదల చేసింది. 4G కనెక్టివిటీతో వస్తున్న ఈ బడ్జెట్ ఫోన్ ధరకు తగ్గట్టుగా ఆకర్షణీయమైన ఫీచర్లను అందిస్తోంది. డిజైన్, డిస్ప్లే విషయానికొస్తే.. ఇందులో 6.61-అంగుళాల TFT LCD స్క్రీన్ ఉంది. ఇది 120Hz రిఫ్రెష్ రేట్, 1010 నిట్స్ పీక్ బ్రైట్నెస్తో పాటు కళ్ళకు రక్షణనిచ్చే ‘ఐ కంఫర్ట్’, ‘డైనమిక్ డిమ్మింగ్’ సాంకేతికతలను సపోర్ట్ చేస్తుంది. స్క్రీన్ గీతలు పడకుండా ‘అలుమినోసిలికేట్’ గ్లాస్ ప్రొటెక్షన్ ఇచ్చారు. అలాగే దుమ్ము, నీటి చినుకుల నుంచి రక్షణ కోసం IP64 రేటింగ్, పడిపోయినా తట్టుకునేలా SGS డ్రాప్ రెసిస్టెన్స్ సర్టిఫికేషన్ కూడా పొందింది.
ఫోన్ మీడియాటెక్ హీలియో G81 ఆల్ట్రా ప్రొసెసర్తో పనిచేస్తుంది. ఆండ్రాయిడ్ 16 ఆధారిత మ్యాజిక్OS 10 ఆపరేటింగ్ సిస్టమ్పై ఇది రన్ అవుతుంది. ఇందులో 4GBర్యామ్, 128GB స్టోరేజ్ అందుబాటులో ఉన్నాయి. వర్చువల్ ర్యామ్ ద్వారా ర్యామ్ను 8GB వరకు విస్తరించుకోవచ్చు. కెమెరా విభాగంలో, వెనుకవైపు 10x డిజిటల్ జూమ్ సపోర్ట్ చేసే 50 మెగాపిక్సెల్ ప్రైమరీ కెమెరాతో పాటు సెకండరీ సెన్సార్ను అందించారు. సెల్ఫీలు, వీడియో కాల్స్ కోసం ముందర 5 మెగాపిక్సెల్ కెమెరా ఉంది.
ఈ స్మార్ట్ఫోన్లోని అతిపెద్ద ఆకర్షణ దీని 7,500mAh భారీ బ్యాటరీ. దీనికి తోడు 45W ఫాస్ట్ ఛార్జింగ్ సపోర్ట్ అందుబాటులో ఉంది. ఇందులో వైఫై, బ్లూటూత్ 5.1, యూఎస్బీ టైప్-సీ, సైడ్ ఫింగర్ప్రింట్ సెన్సార్ వంటి ప్రాథమిక ఫీచర్లు ఉన్నాయి. ప్రస్తుతం మలేషియాలో లాంచ్ అయిన Honor X6e (4GB + 128GB) మోడల్ ధర RM 699 గా ఉంది (మన భారతీయ కరెన్సీలో సుమారు రూ.16,000). ఇది సన్రైజ్ గోల్డ్, మిడ్నైట్ బ్లాక్ రంగుల్లో లభిస్తుంది.