First Ramayana Movie: వెండి తెరపై తొలి రాముడు.. తొలి సీత ఎవరో తెలుసా? 109 ఏళ్ల నాటి అరుదైన ‘రామాయణ’ విశేషాలు ఇవే!

First Ramayana Movie: భారతదేశంలో అత్యంత పవిత్రమైన, ప్రాచీన ఇతిహాసం రామాయణం. ఇది కేవలం ఒక కథ మాత్రమే కాదు, రామాయణం అనేది ఒక విశ్వాసం, ఇది మన సంస్కృతిలో ఒక భాగం. భారతీయ సినిమా ప్రారంభమైనప్పటి నుంచి ఈ గాథ చిత్రసీమపై ప్రగాఢమైన ప్రభావాన్ని చూపింది. తాజాగా భారతీయ సినీ చరిత్రలోనే అత్యంత ప్రతిష్టాత్మకంగా తెరకెక్కుతున్న చిత్రం ‘రామాయణ’. నితేష్ తివారీ డైరెక్షన్‌లో తెరకెక్కుతున్న ఈ చిత్రం నుంచి హనుమాన్ జయంతి సందర్భంగా మేకర్స్ టీజర్ రిలీజ్ చేశారు. ప్రస్తుతం ఇది సోషల్ మీడియాను షేక్ చేస్తోంది. అయితే మీలో ఎంత మందికి వెండి తెరపై తొలి రాముడు, తొలి సీత ఎవరో తెలుసు. అసలు భారతీయ చిత్రపరిశ్రమలో రామాయణ చిత్రం ఎప్పుడు తెరకెక్కిందో తెలుసా.. ఈ స్టోరీలో తెలుసుకుందాం.

READ ALSO: Liquor Sales: ఏరులై పారుతున్న మద్యం.. 70% పెరిగిన బీర్ల అమ్మకాలు.. కానీ ఆదాయం మాత్రం!

తొలి ‘రామాయణం’ సినిమా ఎప్పుడు తీశారు?
నిజానికి సినిమా రంగం ప్రారంభమైనప్పటి నుంచి నేటి వరకు, రామాయణం ఆధారంగా సినిమాలు, టీవీ సీరియల్స్ వస్తూనే ఉన్నాయి. ఇటీవల రణబీర్ కపూర్ నటించిన ‘రామాయణ’ టీజర్ విడుదలైంది. ఈ ఇతిహాసం పట్ల అభిమానులలో ఉన్న అంతులేని క్రేజ్‌ను ఈ టీజర్ మరోసారి స్పష్టం చేస్తుంది. అయితే, ఐదు వేల సంవత్సరాల పురాతనమైన ఈ గాథ ఆధారంగా మొదటి సినిమా ఎప్పుడు వచ్చిందంటే.. 1917లో. అవునండీ.. రామాయణం ఆధారంగా వచ్చిన మొదటి చిత్రం ‘లంక దహన్’. ఇది 1917లో రిలీజ్ అయ్యింది. దీనిని భారతీయ సినిమా పితామహుడైన దాదాసాహెబ్ ఫాల్కే రూపొందించారు. ఇది మూకీ చిత్రం అయినప్పటికీ, ఇండియన్ సినిమా చరిత్రలో ప్రత్యేక స్థానాన్ని కైవసం చేసుకుంది. ఈ “లంకా దహన్”లో, అన్నా సలుంకే రాముడిగా, సీతగా ద్విపాత్రాభినయాలు చేశారు. గణపత్‌జీ షిండే హనుమంతుడిగా, డి.డి.దబ్కే రావణుడిగా నటించారు. భారతీయ సినిమా చరిత్రలో సాంకేతికంగా అత్యున్నత నాణ్యత గల రీళ్లను ఉపయోగించిన తొలి చిత్రాలలో ఇది ఒకటి.

రామాయణంపై ఎన్ని సినిమాలు తీశారంటే
గత 100 ఏళ్లలో రామాయణం ఆధారంగా వచ్చిన చిత్రాల సంఖ్య జనాలను ఆశ్చర్యపరుస్తుంది. కేవలం ప్రధాన రామాయణ కథపైనే సుమారు 48–50 చిత్రాలు నిర్మించబడ్డాయి. హనుమంతుడు, లవకుశలు వంటి వివిధ పాత్రలను కూడా కలుపుకుంటే, 60కి పైగా చిత్రాలు వచ్చినట్లు సమాచారం. ఆ తర్వాత వచ్చిన యానిమేషన్, షార్ట్ ఫిల్మ్‌లు కలిపితే మొత్తం సుమారు 200 చిత్రాలు వచ్చాయి. అంటే, ప్రతి యుగంలోనూ రామాయణం కొత్త కొత్త రీతులలో ప్రేక్షకుల ముందుకు వస్తుందని అర్థం. రామాయణం కథ ఆధారంగా వచ్చిన పలు ప్రముఖ చిత్రాలను చూస్తే.. లంకా దహన్ (1917) – తొలి చిత్రం, భరత్ మిలాప్ (1942), రామ్ రాజ్య (1943). ఈ కాలంలో వచ్చిన అత్యంత ప్రసిద్ధ చిత్రంగా రామ్ రాజ్య నిలిచింది. సంపూర్ణ రామాయణ్ (1961) (పూర్తి కథ). రామాయణ్: ది లెజెండ్ ఆఫ్ ప్రిన్స్ రామ (1992/2001), అంతర్జాతీయంగా నిర్మించిన యానిమేషన్ చిత్రం ఇది. హనుమాన్ (2005) – పిల్లలలో సూపర్ హిట్ చిత్రంగా నిలిచింది. లవ్ కుష్ (1997) – రాముని కుమారుల కథగా రూపుదిద్దుకుంది. ఆదిపురుష్ (2023) – భారీ బడ్జెట్ చిత్రంగా ప్రేక్షకుల ముందుకు వచ్చింది.

టీవీల్లో అతిపెద్ద ‘రామాయణం’ ..
రామానంద్ సాగర్ రామాయణం (1987-88) రాముడిగా నటించిన రామాయణం ఇప్పటికీ టీవీల్లో నంబర్ వన్‌గా పరిగణించబడుతుంది. ఇందులో నటించిన నటీనటులను ప్రేక్షకులు ఇప్పటికీ దేవుళ్లుగా కొలుస్తారు. ఇందులో రాముడిగా అరుణ్ గోవిల్, సీతగా దీపికా చిఖాలియా, లక్ష్మణుడిగా సునీల్ లాహిరి నటించారు. ఈ సీరియల్ ప్రతి ఆదివారం ఉదయం 9:30 గంటలకు ప్రసారం అయ్యేది. ఆ రోజుల్లో ఈ 78 ఎపిసోడ్‌ల సీరియల్‌ వస్తుందంటే.. వీధులన్నీ నిర్మానుష్యంగా మారిపోయేవి. 2020 లాక్‌డౌన్ సమయంలో కూడా ఇది మళ్లీ ప్రసారం అయ్యి టీఆర్‌పీ రికార్డులను బద్దలు కొట్టింది. రామాయణం ఆధారంగా రూపొందించిన ఇతర టీవీ కార్యక్రమాలు ఇవే.. రామాయణం (2002), రామాయణం (2008-09), సీతా కే రామ్ (2015-16), రామ్ సియా కే లువ్ కుష్ (2019-20), శ్రీమద్ రామాయణం (2024). మొత్తం మీద, హిందీలో 7-8 పెద్ద షోలు రూపొందించారు. అయితే చిన్నవి, పెద్దవి కలిపి 20కి పైగా వెర్షన్లు అందుబాటులో ఉన్నాయి.

సరికొత్త ‘రామాయణం’..
నితేష్ తివారీ దర్శకత్వంలో రామాయణం మరోసారి వెండితెరపైకి వస్తోంది. ఈ చిత్రంలో శ్రీరాముడిగా రణబీర్ కపూర్, సీతామాతగా సాయి పల్లవి, రావణుడిగా యశ్, లక్ష్మణుడిగా రవిదూబే, హనుమంతుడిగా సన్నీ డియోల్ వంటి అగ్ర నటులు నటిస్తున్నారు. ఈ సినిమా ఫస్ట్ పార్ట్ 2026 దీపావళికి విడుదల కానుండగా, సెకండ్ పార్ట్ 2027లో రిలీజ్ కానుంది. ఈ చిత్ర నిర్మాతలు సినిమాను ప్రపంచవ్యాప్తంగా విడుదల చేయడానికి ప్లాన్ చేస్తున్నారు. రామాయణం అనేది కేవలం ఒక కథ కాదు, అది భారతదేశపు ఆత్మ. అందుకే 100 ఏళ్ల తర్వాత కూడా ఈ ఇతిహాసం ప్రతి తరాన్ని ఆకట్టుకుంటూనే ఉంది. ఇకపైనా కూడా ఆకట్టుకుంటూనే ఉంటుంది.

READ ALSO: Donald Trump: ఇదెక్కడి విడ్డూరం సామీ.. 20 నిమిషాల్లో 40 సార్లు ‘నేనే తోపు’ అని చెప్పుకున్న ట్రంప్!