Himmat Singh: అరెరే.. ఇదేం రన్ అవుట్ భయ్యా.. ఇప్పటి వరకు చూడలే.! వీడియో వైరల్..

Himmat Singh: ఢిల్లీ ప్రీమియర్ లీగ్ (DPL)లో క్రికెట్ అభిమానులను ఆశ్చర్యానికి గురిచేసే అరుదైన ఘటన ఆవిష్కృతమైంది. న్యూ ఢిల్లీ టైగర్స్, ఔటర్ ఢిల్లీ వారియర్స్ మధ్య జరిగిన లీగ్ మ్యాచ్‌లో చివరి బంతికి జరిగిన ఓ విచిత్రమైన రనౌట్ ఇప్పుడు సోషల్ మీడియాలో వైరల్ అవుతుంది. ఈ రన్ కారణంగా మ్యాచ్‌ను సూపర్ ఓవర్‌కు తీసుకెళ్లింది. ఫీల్డింగ్‌లో జరిగిన చిన్న పొరపాటు, ఆ తర్వాత నిరాశతో చేసిన ఒక కిక్.. చివరకు అద్భుత రనౌట్‌.. అబ్బో.. ఇలా ఎన్ని ట్విస్ట్ లో.. మరి ఆ సంఘటనెంటో చూసేద్దామా..

156 పరుగుల లక్ష్యాన్ని ఛేదిస్తున్న ఔటర్ ఢిల్లీ వారియర్స్‌కు చివరి బంతికి గెలుపు కోసం కేవలం ఒక పరుగు మాత్రమే అవసరం. బ్యాటర్ ప్రథమ్ సలూజా బంతిని మిడ్ ఆన్ దిశగా ఆడి వెంటనే పరుగుకు చేశాడు. అక్కడ ఫీల్డింగ్ చేస్తున్న హిమ్మత్ సింగ్ బంతిని అందుకోవడానికి ముందుకు వచ్చాడు. అయితే అతను బంతిని సరిగా పట్టుకోలేకపోయాడు. దీంతో నిరాశకు గురైన హిమ్మత్.. కోపంతో బంతిని కాలితో తన్నాడు. అయితే ఆ కిక్ చేసిన బంతి నేరుగా వికెట్లను తాకింది. అయితే అప్పటికి సలూజా క్రీజులోకి చేరకపోవడంతో అతను రనౌట్ అయ్యాడు.

బంతి వికెట్లను తాకిన వెంటనే ఏమి జరిగిందో హిమ్మత్ సింగ్‌కే కొన్ని క్షణాలు అర్థం కాలేదు. అయితే అతని సహచర ఆటగాళ్లు మాత్రం వికెట్ పడటంతో సంబరాలు చేసుకున్నారు. ఈ రనౌట్‌తో ఔటర్ ఢిల్లీ వారియర్స్ 15 ఓవర్లలో 155/9 స్కోరుతో నిలిచింది. అంతకుముందు బ్యాటింగ్ చేసిన న్యూ ఢిల్లీ టైగర్స్ కూడా 156/5 పరుగులు చేయడంతో మ్యాచ్ టై అయి సూపర్ ఓవర్‌కు వెళ్లింది. ఇక్కడ మరో ఆసక్తికర విషయం ఏమిటంటే.. చివరి రెండు బంతుల్లో ఔటర్ ఢిల్లీ వారియర్స్ వరుసగా రెండు రనౌట్లు అయ్యింది. చివరి బంతికి ముందు కెప్టెన్ సిద్ధాంత్ శర్మ కూడా రనౌట్ కావడం మ్యాచ్‌ను మరింత ఉత్కంఠభరితంగా మార్చింది.

మ్యాచ్ సూపర్ ఓవర్‌కు దారి తీయగా.. సూపర్ ఓవర్‌ లో ముందుగా బ్యాటింగ్ చేసిన ఔటర్ ఢిల్లీ వారియర్స్ 1 ఓవర్‌లో 20/1 పరుగులు చేసి భారీ లక్ష్యాన్ని నిర్దేశించింది. 21 పరుగుల లక్ష్యంతో బరిలోకి దిగిన న్యూ ఢిల్లీ టైగర్స్‌కు ఆరంభంలోనే ఎదురుదెబ్బ తగిలింది. కెప్టెన్ హిమ్మత్ సింగ్ రెండు బంతుల్లో ఒక సిక్సర్‌తో 6 పరుగులు చేసి శివమ్ శర్మ బౌలింగ్‌లో ఔటయ్యాడు. వెంటనే హృతిక్ షోకీన్ కూడా ఖాతా తెరవకుండానే పెవిలియన్ చేరడంతో న్యూ ఢిల్లీ టైగర్స్ 0.3 ఓవర్లలో 6/2 స్కోరుతో ఇన్నింగ్స్ ముగిసింది. దీనితో ఔటర్ ఢిల్లీ వారియర్స్ కు విజయం వరించింది.

What a run out by Himmat Singh 💥
A run out,out of nowhere in Delhi Premier League pic.twitter.com/sqVDV5ieSo

— StrangerMan (@_StrangerMan7) August 4, 2026