Cristiano Ronaldo: అర్జెంటీనాపై వివాదాస్పద పోస్ట్‌ను రొనాల్డో లైక్ చేశారా? సోషల్ మీడియాలో నెటిజన్ల రచ్చ..

2026 ఫిఫా ప్రపంచకప్‌లో అర్జెంటీనా జట్టుకు ఫిఫా (FIFA) అనుకూలంగా వ్యవహరించిందంటూ సోషల్ మీడియాలో వైరల్ అయిన ఒక ఇన్‌స్టాగ్రామ్ పోస్ట్‌ను పోర్చుగల్ స్టార్ ఫుట్‌బాలర్ క్రిస్టియానో రొనాల్డో “లైక్” చేశారనే ప్రచారం తీవ్ర కలకలం రేపింది. ఎక్స్ (ట్విట్టర్), ఫేస్‌బుక్ , ఇన్‌స్టాగ్రామ్‌లలో విస్తృతంగా షేర్ అవుతున్న ఒక స్క్రీన్‌షాట్‌లో, రొనాల్డో తన అధికారిక వెరిఫైడ్ ఇన్‌స్టాగ్రామ్ ఖాతా ద్వారా అర్జెంటీనాపై విమర్శలు చేసిన పోస్ట్‌ను లైక్ చేసినట్లు చూపించారు. అర్జెంటీనా ఫైనల్ చేరుకోవడానికి వివాదాస్పద రెఫరీ నిర్ణయాలు , ఫిఫా నుండి లభించిన అనుకూల వైఖరే కారణమని ఆ పోస్ట్ ఆరోపించింది. దీంతో రొనాల్డో కూడా ఆ వ్యాఖ్యలను సమర్థిస్తున్నారని అభిమానులు భావించారు.

అయితే, లోతుగా పరిశీలిస్తే ఈ వైరల్ పూర్తిగా అబద్ధమని .. లభించిన ఆధారాలు నకిలీవని తేలింది. అసలు ఇన్‌స్టాగ్రామ్ పోస్ట్‌ను క్షుణ్ణంగా తనిఖీ చేయగా, రొనాల్డో ఖాతా దానిని లైక్ చేసినట్లు ఎటువంటి ఆధారాలు లభించలేదు. ఇన్‌స్టాగ్రామ్ లైక్‌లను డైనమిక్‌గా చూపుతుంది కాబట్టి ప్రత్యేకంగా పరిశీలించినప్పటికీ రొనాల్డో పేరు కనిపించలేదు. సోషల్ మీడియాలో చక్కర్లు కొడుతున్న ఆ స్క్రీన్‌షాట్ ఎడిటింగ్ ద్వారా క్రియేట్ చేయబడినదిగా స్పష్టమవుతోంది.

ఈ అంశంపై రొనాల్డో కానీ, ఆయన బృందం కానీ ఎలాంటి అధికారిక స్పందన తెలియజేయలేదు. అలాగే ఏ విశ్వసనీయ మీడియా సంస్థ కూడా రొనాల్డో ఆ పోస్ట్‌ను లైక్ చేసినట్లు ధ్రువీకరించలేదు. సరైన ఆధారం లేకపోవడంతో ఈ ప్రచారంలో నిజం లేదని తేలింది. ఈ ప్రపంచకప్‌లో పోర్చుగల్ ప్రయాణం రౌండ్ ఆఫ్ 16లోనే స్పెయిన్ చేతిలో ఓటమితో ముగిసింది. లియోనెల్ మెస్సీ, నేమార్ వంటి ఆటగాళ్లతో పాటు క్రిస్టియానో రొనాల్డోకు కూడా ఇది చివరి ప్రపంచకప్ కావచ్చు అని భావిస్తున్న సమయంలో ఇటువంటి ఆధారాలు లేని వివాదాలు తెరపైకి రావడం గమనార్హం.