EPFO WhatsApp Channel: ఉద్యోగుల భవిష్య నిధి సంస్థ (EPFO) ఎప్పటి కప్పుడు కొత్త అప్డేట్స్ తీసుకొస్తూనే ఉంది.. ఒకప్పుడు PF వివరాలు తెలుసుకోవాలన్నా కష్టమే ఉండేది.. కానీ, క్రమంగా దానిని సింపుల్‌పై చేస్తూ వస్తుంది EPFO.. కోట్లాది మంది ఉద్యోగులు, సభ్యులకు సంబంధించిన ప్రావిడెంట్ ఫండ్, పెన్షన్, ఇతర ప్రయోజనాలపై ఎప్పటికప్పుడు సమాచారాన్ని అందిస్తోంది. ఇందుకోసం అధికారిక వెబ్‌సైట్‌తో పాటు సోషల్ మీడియా వేదికలనూ ఉపయోగిస్తోంది. ఈ క్రమంలో EPFO తన అధికారిక వాట్సాప్ ఛానెల్ ద్వారా కూడా కీలక అప్‌డేట్స్‌ను అందుబాటులోకి తీసుకొచ్చింది. ఈ ఛానెల్‌లో చేరడం ద్వారా ఉద్యోగులు తమకు అవసరమైన సమాచారాన్ని సులభంగా తెలుసుకోవచ్చు.
EPFO వాట్సాప్ ఛానెల్‌లో ఏ సమాచారం లభిస్తుంది?
గతంలో పోలిస్తే ఉద్యోగులు కూడా ఎంతో అప్‌డేట్‌ అయ్యారు.. EPFO గత ఏడాది ప్రారంభించిన వాట్సాప్ ఛానెల్‌కు క్రమంగా ఆదరణ పెరుగుతోంది. సంస్థ గతంలో వెల్లడించిన సమాచారం ప్రకారం, ఈ ఛానెల్‌లో సబ్‌స్క్రైబర్ల సంఖ్య రెండు లక్షలకు చేరుకుంది. అయినప్పటికీ, చాలామంది EPFO సభ్యులకు ఈ సదుపాయం గురించి ఇంకా తెలియదు. ఉద్యోగులు, యజమానులు ఇద్దరికీ ఉపయోగపడే విధంగా ఈ ఛానెల్ ద్వారా వివిధ పథకాలు, కార్యక్రమాలు, గడువులు, కీలక నిర్ణయాలకు సంబంధించిన సమాచారాన్ని సంస్థ పంచుకుంటోంది.
EPF, EPS, EDLI పథకాలపై అప్డేట్స్
ఈ వాట్సాప్ ఛానెల్‌లో ఉద్యోగుల ప్రావిడెంట్ ఫండ్ (EPF), ఉద్యోగుల పెన్షన్ పథకం (EPS), ఉద్యోగుల డిపాజిట్ లింక్డ్ ఇన్సూరెన్స్ (EDLI) పథకాలకు సంబంధించిన సమాచారాన్ని తెలుసుకోవచ్చు. ఈ పథకాలపై తాజా ప్రకటనలు, ముఖ్యమైన మార్పులు, కార్యక్రమాల వివరాలను EPFO అందిస్తుంది. అలాగే సభ్యుల సమస్యల పరిష్కారం కోసం నిర్వహించే ప్రత్యేక శిబిరాలకు సంబంధించిన సమాచారాన్ని కూడా పంచుకుంటుంది.
PF ఉపసంహరణపై ట్యుటోరియల్స్ కూడా
అయితే, EPFO వాట్సాప్ ఛానెల్‌లో కేవలం ప్రకటనలే కాకుండా, ఉపయోగకరమైన ట్యుటోరియల్స్‌కు సంబంధించిన లింకులను కూడా అందిస్తోంది. EPF అడ్వాన్స్ ఉపసంహరణ ప్రక్రియ వంటి అంశాలను వివరించే యూట్యూబ్ వీడియోలు ఇందులో ఉంటాయి. ప్రధాన మంత్రి వికసిత్ భారత్ రోజ్‌గార్ యోజన కింద అందించే ప్రయోజనాలు, సంబంధిత చెల్లింపులపై సమాచారాన్ని తెలుసుకోవడానికి ఉపయోగపడే వీడియోలు, లింకులను కూడా సంస్థ పంచుకుంటుంది. తద్వారా ఉద్యోగులు వివిధ పథకాల గురించి సులభంగా అవగాహన పొందవచ్చు.
EPFO వాట్సాప్ ఛానెల్‌లో ఎలా చేరాలి?
* అధికారిక వాట్సాప్ ఛానెల్: EPFO WhatsApp Channel
* లింక్‌ను తెరిచి వాట్సాప్‌లో ఛానెల్‌ను ఫాలో చేయాలి. ఆ తర్వాత EPFO నుంచి వచ్చే తాజా అప్‌డేట్స్‌ను వాట్సాప్‌లోనే చూడవచ్చు. ముఖ్యమైన ప్రకటనలు, పథకాల వివరాలు, అవగాహన వీడియోల లింకులను తెలుసుకోవడానికి ఈ సదుపాయం ఉపయోగపడుతుంది.
వాట్సాప్‌లోనే PF పనులు పూర్తి చేయవచ్చా?
అయితే, ఒక ముఖ్యమైన విషయం గుర్తుంచుకోవాలి. EPFO వాట్సాప్ ఛానెల్ కేవలం సమాచారాన్ని అందించడానికి మాత్రమే ఉపయోగపడుతుంది. దీని ద్వారా నేరుగా PF డబ్బు ఉపసంహరణ, పెన్షన్ దరఖాస్తు లేదా ఇతర ఖాతా సంబంధిత సేవలను పూర్తి చేయలేరు. EPF, EPS, EDLIలకు సంబంధించిన సేవలను పొందాలంటే EPFO అధికారిక పోర్టల్ లేదా UMANG యాప్‌ను ఉపయోగించాలి. అవసరమైతే మీ ప్రాంతీయ EPF కార్యాలయాన్ని కూడా సంప్రదించవచ్చు. కాబట్టి PFకు సంబంధించిన తాజా సమాచారం కోసం వాట్సాప్ ఛానెల్‌ను ఫాలో అవుతూ, ఖాతా సంబంధిత పనుల కోసం అధికారిక సేవా వేదికలను వినియోగించుకోవడం మంచిది. ఇంకా ఎందుకు ఆలస్యం.. వాట్సాప్ చానల్‌ లో చేరి.. తాజా అప్డేట్స్ పొందండి..