Elon Musk Documentary ‘Musk’ Trailer: ప్రపంచ అపరకుబేరులలో ఒకరైన టెస్లా, స్పేస్ఎక్స్ అధినేత ఎలాన్ మస్క్ జీవితంపై కొత్త డాక్యుమెంటరీ తెరకెక్కింది. ఆస్కార్ అవార్డు గ్రహీత అలెక్స్ గిబ్నీ దర్శకత్వం వహించిన ఈ చిత్రం ‘Musk’. ఇందులో మస్క్ విజయాలతో పాటు.. ఆయన ప్రభావం, వివాదాలు, వ్యక్తిత్వంపై కూడా లోతుగా విశ్లేషించారు.
దాదాపు నాలుగు గంటల నిడివి ఉన్న ఈ డాక్యుమెంటరీ సెప్టెంబర్ 8న వెనిస్ ఫిల్మ్ ఫెస్టివల్లో ప్రీమియర్ కానుంది. ఆ తర్వాత టొరంటో ఇంటర్నేషనల్ ఫిల్మ్ ఫెస్టివల్లో ప్రదర్శించనున్నారు. అమెరికాలో అక్టోబర్ 16న థియేటర్లలో విడుదల చేయనున్నారు.
ట్రైలర్లో షాకింగ్ కామెంట్స్..ఎలాన్ మస్క్ జీవితంపై ‘Musk’ పేరుతో డాక్యుమెంటరీ
తాజాగా విడుదలైన టీజర్లో మస్క్ను ఒకవైపు “ప్రపంచంలోనే గొప్ప జీవించి ఉన్న ఆవిష్కర్త”, “నిజ జీవిత ఐరన్ మ్యాన్”గా అభివర్ణించగా.. మరోవైపు ఆయనను “అస్తవ్యస్తమైన, ఊహించలేని వ్యక్తి”, “క్రూరమైన, స్వార్థపరుడు” అంటూ విమర్శించే వ్యాఖ్యలు కూడా వినిపిస్తాయి. అంతేకాకుండా మస్క్ను “భూమిపై ఎలాంటి నియంత్రణ లేని అత్యంత శక్తివంతమైన వ్యక్తి”గా కూడా టీజర్లో పేర్కొన్నారు. చివర్లో ఆయనను “తన మతిని కోల్పోయిన వ్యక్తి”, “ఫాసిస్ట్” అంటూ పలు తీవ్ర వ్యాఖ్యలు వినిపిస్తాయి. టీజర్లో రాకెట్ అంతరిక్షంలోకి దూసుకెళ్లి చివర్లో పేలిపోవడంతో డాక్యుమెంటరీ టైటిల్ ‘Musk’ తెరపై కనిపిస్తుంది. చూడాలి మరి ఈ ‘మస్క్’ లో ఎలాంటి విషయాలు బయటికి వస్తాయో..
