Dondakaya Roti Pachadi: పల్లీల స్పెషల్ టచ్‌తో ‘దొండకాయ రోటి పచ్చడి’.. టేస్ట్ చేస్తే లొట్టలేసుకుంటూ తింటారంతే.!

Dondakaya Roti Pachadi Recipe: తెలుగు వారి ఇళ్లలో పచ్చళ్లకు ఓ ప్రత్యేక స్థానం ఉంటుంది. అందులోనూ రోటి పచ్చడికి ఉండే రుచి గురించి ప్రత్యేకంగా చెప్పనక్కర్లేదు. సాధారణంగా దొండకాయతో కూరలు, వేపుళ్లు చేస్తుంటారు. కానీ దొండకాయ, టమాటాతో చేసే రోటి పచ్చడి మాత్రం ఒకసారి రుచి చూస్తే మళ్లీ మళ్లీ చేయాలనిపించేలా ఉంటుంది. వేడివేడి అన్నంలో కొద్దిగా నెయ్యి వేసుకుని ఈ పచ్చడిని తింటే ఆ రుచి అమోఘం అంతే.. దీనిని ఇడ్లీ, దోశ వంటి టిఫిన్స్‌కు కూడా ఈ పచ్చడి అద్భుతంగా ఉంటుంది. ఫ్రిజ్‌లో నిల్వ ఉంచితే 4 రోజుల వరకు తాజాగా ఉంటుంది. మరి ఈ టేస్టీ దొండకాయ రోటి పచ్చడిని ఎలా చేయాలో చూసేద్దామా..

కావలసిన పదార్థాలు:
* దొండకాయలు – పావు కేజీ
* పెద్ద టమాటాలు – 2
* పచ్చిమిర్చి – 12 నుంచి 15
* వేరుశనగ (పల్లీలు)– 1 టేబుల్ స్పూన్
* వెల్లుల్లి రెబ్బలు – 3 నుంచి 4
* చింతపండు – చిన్న ముక్క
* కొత్తిమీర – కొద్దిగా
* నూనె – 2 టేబుల్ స్పూన్లు
* ఉప్పు – తగినంత

తయారీ విధానం:
ముందుగా దొండకాయలను శుభ్రంగా కడిగి చిన్న ముక్కలుగా కట్ చేసుకోవాలి. టమాటాలను కూడా కొంచెం పెద్ద ముక్కలుగా కోసి సిద్ధం పెట్టుకోవాలి. ఇప్పుడు స్టవ్‌పై కడాయి పెట్టుకుని అందులో రెండు టేబుల్ స్పూన్ల నూనె వేయాలి. నూనె వేడెక్కిన తర్వాత దొండకాయ ముక్కలు, పచ్చిమిర్చి, టమాటా ముక్కలు వేసి బాగా కలపాలి. తర్వాత మూత పెట్టి మీడియం మంటపై మగ్గించాలి. మధ్య మధ్యలో మూత తీసి కలుపుతూ ఉండాలి. దొండకాయలు, టమాటాలు బాగా మెత్తబడుతూ కొద్దిగా బ్రౌన్ కలర్ వచ్చే వరకు వేయించాలి. ఇలా బాగా ఫ్రై అయితేనే పచ్చడికి మంచి రుచి వస్తుంది. ముక్కలు వేగిన తర్వాత స్టవ్ ఆఫ్ చేసి పూర్తిగా చల్లారనివ్వాలి.

ఇంతలో మరో చిన్న పాన్‌లో పల్లీలను దోరగా వేయించుకోవాలి. ఇప్పుడు మిక్సీ జార్‌లో వేయించిన పల్లీలు, వెల్లుల్లి రెబ్బలు, చింతపండు వేసి ఒకసారి బ్లెండ్ చేసుకోవాలి. ఆ తర్వాత చల్లారిన దొండకాయ, టమాటా మిశ్రమాన్ని జార్‌లో వేసి తగినంత ఉప్పు కలపాలి. పచ్చడిని మరీ మెత్తగా కాకుండా కొద్దిగా బరకగా ఉండేలా మిక్సీ పట్టాలి. అలా చేస్తేనే రోటి పచ్చడికి అసలైన టెక్స్చర్ వస్తుంది. రోట్లో నూరితే మరింత రుచిగా ఉంటుంది.

చివరగా పచ్చడిని ఒక గిన్నెలోకి తీసుకుని సన్నగా తరిగిన కొత్తిమీర కలపాలి. అంతే.. నోరూరించే దొండకాయ టమాటో రోటి పచ్చడి రెడీ. ఈ పచ్చడిని వేడి అన్నం, నెయ్యితో తింటే అదిరిపోయే రుచి వస్తుంది. అలాగే ఇడ్లీ, దోశ, చపాతీతో కూడా చాలా బాగుంటుంది. ఇంట్లో ఒక్కసారి ట్రై చేస్తే మీ ఫ్యామిలీకి ఖచ్చితంగా ఫేవరెట్ అయిపోతుంది.