Manish Sisodia: మనీష్ సిసోడియాకు ఢిల్లీ హైకోర్టు బెయిల్ నిరాకరణ..
Manish Sisodia: దేశ రాజధాని ఢిల్లీలోని మద్యం పాలసీలో జరిగిన కుంభకోణంపై సెంట్రల్ బ్యూరో ఆఫ్ ఇన్వెస్టిగేషన్ (సీబీఐ) కేసులో ఢిల్లీ మాజీ ఉప ముఖ్యమంత్రి మనీష్ సిసోడియాకు ఢిల్లీ హైకోర్టు ఈరోజు బెయిల్ నిరాకరించింది. జస్టిస్ దినేష్ కుమార్ శర్మతో కూడిన సింగిల్ జడ్జి బెంచ్ బెయిల్ పిటిషన్ను కొట్టివేస్తూ, మనీష్ సిసోడియాపై ఆరోపణలు తీవ్రమైనవని పేర్కొంది. ఈ హైకోర్టు ఆదేశాలపై సిసోడియా సుప్రీంకోర్టుకు వెళ్లనున్నట్లు సంబంధిత వర్గాలు తెలిపాయి. బెయిల్ పిటిషన్పై తీర్పును వెలువరిస్తూ, సిసోడియా ప్రభావవంతమైన వ్యక్తి అని, ఆయన బెయిల్పై విడుదలైతే సాక్షులను ప్రభావితం చేసే అవకాశాన్ని తోసిపుచ్చలేమని హైకోర్టు పేర్కొంది.
Read Also: Namibia Study Tour: చిరుతలు ఎందుకు చనిపోతున్నాయి?.. అధ్యయనం కోసం నమీబియా స్టడీ టూర్
సీబీఐ దాఖలు చేసిన సప్లిమెంటరీ ఛార్జిషీట్ను పరిగణనలోకి తీసుకున్న ఢిల్లీలోని రౌస్ అవెన్యూ కోర్టు గతంలో ఆమ్ ఆద్మీ పార్టీ నాయకుడి జ్యుడీషియల్ కస్టడీని జూన్ 1 వరకు పొడిగించింది. చదువుకునేందుకు కుర్చీ, టేబుల్ ఇవ్వాలన్న మనీష్ సిసోడియా అభ్యర్థనను పరిగణనలోకి తీసుకోవాలని జైలు అధికారులను ఆదేశించింది. ఢిల్లీలో మద్యం వ్యాపారంలో గుత్తాధిపత్యం, కార్టలైజేషన్ను సులభతరం చేసేందుకు మనీష్ సిసోడియా ఎక్సైజ్ పాలసీని రూపొందించి అమలు చేశారని ఆరోపించిన సంగతి తెలిసిందే. ఈ కేసులో ఫిబ్రవరి 26న సిసోడియాను సీబీఐ అరెస్టు చేసింది.