Vaibhav Sooryavanshi: ఆ బ్యాటింగ్ స్టైలే వైభవ్‌కు శాపమా..? ఊహించని ప్రమాదంలో సూర్యవంశీ..

భారత యువ సంచలనం వైభవ్ సూర్యవంశీ తన మెరుపు బ్యాటింగ్‌తో చాలా తక్కువ సమయంలోనే ప్రపంచ క్రికెట్ దృష్టిని ఆకర్షించాడు. కేవలం 15 ఏళ్ల వయసులోనే టీమిండియాలోకి ఎంట్రీ ఇచ్చిన ఈ యువ ఆటగాడు, త్వరలోనే ఐర్లాండ్-ఇంగ్లాండ్ పర్యటనలో అంతర్జాతీయ అరంగేట్రం చేసేందుకు సిద్ధమవుతున్నాడు. ఇటీవల శ్రీలంకతో జరిగిన వన్డే ట్రై-సిరీస్ ఫైనల్‌లో కేవలం 29 బంతుల్లోనే 94 పరుగులు చేసి, అందులో 11 బంతుల్లోనే హాఫ్ సెంచరీ బాది లిస్ట్-ఎ క్రికెట్‌లో సరికొత్త రికార్డు సృష్టించాడు.

అయితే, సూర్యవంశీ సుదీర్ఘ కెరీర్ మరియు ఫిట్‌నెస్‌పై దక్షిణాఫ్రికా మాజీ దిగ్గజ బ్యాటర్ డారిల్ కలినన్ తీవ్ర ఆందోళన వ్యక్తం చేశాడు. సూర్యవంశీ ఆట శైలి పూర్తిగా పవర్ హిటింగ్‌తో కూడుకున్నదని, ప్రతి షాట్ కోసం అతను విపరీతమైన బ్యాట్ స్పీడ్‌పై ఆధారపడతాడని కలినన్ పేర్కొన్నాడు. ఈ వయసులో భారీ బ్యాట్‌తో అంత వేగంగా స్వింగ్ చేయడం వల్ల అతని మణికట్టు, మోచేతులు మరియు కీళ్లపై తీవ్ర ప్రభావం పడుతుందని హెచ్చరించాడు.

గతంలో భారత క్రికెట్ దేవుడు సచిన్ టెండూల్కర్ కూడా కెరీర్ ఆరంభంలో ఇలాగే దూకుడుగా ఆడాడని, అయితే 2004లో వచ్చిన ‘టెన్నిస్ ఎల్బో’ గాయం కారణంగా అతని కెరీర్ దాదాపు ముగిసిపోయే పరిస్థితి వచ్చిందని కలినన్ గుర్తుచేశాడు. సచిన్ అంతగా బ్యాట్ స్వింగ్ చేయకపోయినా గాయాల బారిన పడ్డాడని, మరి సూర్యవంశీ లాంటి హిట్టర్ పరిస్థితి ఏమిటని ప్రశ్నించాడు. ప్రస్తుతం క్రికెట్ షెడ్యూల్ చాలా బిజీగా ఉందని, నిరంతరాయంగా ఆడటం వల్ల 15 ఏళ్ల వయసులోనే ఎదుగుతున్న అతని కండరాలు, లిగమెంట్లు తీవ్ర ఒత్తిడికి లోనవుతాయని అన్నాడు.

తాము ఆడే రోజుల్లో తేలికపాటి బ్యాట్లు వాడేవాళ్లమని, తక్కువ క్రికెట్ ఆడేవాళ్లమని, అయినప్పటికీ కొందరికి మణికట్టు సమస్యలు వచ్చేవని కలినన్ తెలిపాడు. నేటి తరం ఆధునిక శిక్షణ, రికవరీ పద్ధతులు అందుబాటులో ఉన్నప్పటికీ, ఈ యువ ఆటగాడి సుదీర్ఘ భవిష్యత్తు , ఆరోగ్యం పట్ల తనకు ఆందోళనగా ఉందని, వైద్య నిపుణుల సలహాలు కూడా పరిగణనలోకి తీసుకోవాలని అతను సోషల్ మీడియా వేదికగా సూచించాడు.