Bangladesh President: “నన్ను చంపినా సరే.. రాజీనామా చేయనని చెప్పాను!” యూనస్‌పై బంగ్లాదేశ్ ప్రెసిడెంట్ సంచలన వ్యాఖ్యలు..
- Follow Us :
-
-
Add as a preferred
source on google
Bangladesh President: బంగ్లాదేశ్ అధ్యక్షుడు మొహమ్మద్ షాబుద్దీన్, ఆ దేశ మాజీ ప్రధాన సలహాదారు మొహమ్మద్ యూనస్‌పై తీవ్రమైన ఆరోపణలు చేశారు. తనను పదవి నుంచి తొలగించడానికి యూనస్ మూడుసార్లు విఫలయత్నం చేశారని ఆయన బహిరంగంగా వెల్లడించారు. ఈ సందర్భంగా ఆయన ఒక ఇంటర్వ్యూలో మాట్లాడుతూ.. “అక్టోబర్ 2024లో నన్ను పదవి నుంచి తప్పించడానికి మొదటి ప్రయత్నం జరిగింది. యూనస్ నన్ను ఒక భారంగా భావించారు. కానీ నేను లొంగలేదు, ‘నన్ను ఇక్కడే చంపండి, కానీ రాజీనామా చేయను’ అని తెగేసి చెప్పాను.” అని షాబుద్దీన్ తెలిపారు.
తనను తొలగించడానికి మొదట న్యాయమూర్తులను, ఆ తర్వాత ఆర్మీ చీఫ్‌ను కూడా యూనస్ సంప్రదించారని, అయితే ఆర్మీ చీఫ్ అందుకు నిరాకరించడంతో ఆ ప్రయత్నాలు ఫలించలేదని అధ్యక్షుడు వెల్లడించారు. దేశంలో ఎప్పటి నుంచో ఉన్న సంప్రదాయం ప్రకారం ప్రధాన సలహాదారు విదేశీ పర్యటనలకు వెళ్లినప్పుడు అధ్యక్షుడికి సమాచారం ఇవ్వాలి. కానీ యూనస్ తన పర్యటనల గురించి గానీ, తీసుకున్న నిర్ణయాల గురించి గానీ తనకు ఏమీ చెప్పడం లేదని షాబుద్దీన్ ఆవేదన వ్యక్తం చేశారు. అమెరికాతో జరిగిన సుంకాల ఒప్పందం వంటి కీలక విషయాలను కూడా తన నుంచి దాచిపెట్టారని, తన ఆఫీసులోని ప్రెస్ విభాగాన్ని కూడా రద్దు చేశారని ఆయన మండిపడ్డారు.
అధ్యక్షుడిని ఒక ఖైదీలా..
“నేను ప్రధాన సలహాదారుని నియమించినప్పటికీ, నన్ను ప్రభుత్వంలో పేరుకే ఉంచడానికి ప్రయత్నిస్తున్నారు. ఇతర దేశాల నుంచి వచ్చిన ఆహ్వాన లేఖలను కూడా నాకు ఇవ్వడం లేదు. నేను ఎవరినీ కలవకుండా, మాట్లాడకుండా అడ్డుకుంటున్నారు. ఒకవేళ నేను అధ్యక్షుడిగా లేకపోతే, ఈ ప్రభుత్వం ఇప్పటికీ ఎన్నికల ఊసే ఎత్తేది కాదు” అని షాబుద్దీన్ సంచలన వ్యాఖ్యలు చేశారు. యూనస్, ఆయన ప్రభుత్వం విచారణ ఎదుర్కొంటున్న సమయంలో షబుద్దీన్ ఇంటర్వ్యూ బయటికి రావడం సంచలనాన్ని రేపుతుంది.