FIFA World Cup 2026: 28 ఏళ్ల తర్వాత ఆస్ట్రియా విజయం.. జోర్డాన్‌పై 3-1 తేడాతో.!

FIFA World Cup 2026: 28 ఏళ్ల విరామం తర్వాత ఫిఫా వరల్డ్‌కప్‌లో అడుగుపెట్టిన ఆస్ట్రియా జట్టు విజయంతో ప్రారంభించింది. శాన్‌ఫ్రాన్సిస్కో బే ఏరియా స్టేడియంలో జరిగిన మ్యాచ్‌లో అరంగేట్ర జట్టు జోర్డాన్‌ పై 3-1 తేడాతో భారీ విజయం సాధించింది ఆస్ట్రియా. రొమానో ష్మిడ్ తొలి అర్ధభాగంలో చేసిన గోల్‌తో పాటు జోర్డాన్ డిఫెండర్ యజాన్ అల్ అరబ్ చేసిన సెల్ఫ్ గోల్, అదనపు సమయంలో మార్కో ఆర్నాటోవిచ్ సాధించిన పెనాల్టీ గోల్ ఆస్ట్రియాకు విజయాన్ని అందించాయి.

మ్యాచ్ మొదటి నుంచే జోర్డాన్ దూకుడుగా ఆడింది. రెండో నిమిషంలోనే కెప్టెన్ ఎహ్సాన్ హద్దాద్ గోల్ చేసే అవకాశం దక్కించుకున్నప్పటికీ అతని షాట్ సైడ్ నెట్‌ను మాత్రమే తాకింది. అనంతరం ఒదె ఫఖౌరీ దూరం నుంచి బలమైన షాట్ కొట్టగా.. ఆస్ట్రియా గోల్‌కీపర్ అలెగ్జాండర్ ష్లాగర్ అద్భుతంగా అడ్డుకున్నాడు. జోర్డాన్ ఒత్తిడిని తట్టుకున్న ఆస్ట్రియా 20వ నిమిషంలో ఆధిక్యంలోకి వెళ్లింది. పెనాల్టీ బాక్స్ అంచు వద్ద బంతిని అందుకున్న రొమానో ష్మిడ్ శక్తివంతమైన షాట్‌తో బంతిని నేరుగా గోల్‌పోస్ట్‌ లోకి పంపించి తన జట్టుకు తొలి గోల్ అందించాడు.

రెండో అర్ధభాగం ప్రారంభమైన ఐదు నిమిషాలకే జోర్డాన్ సమం చేసింది. నూర్ అల్ రావాబ్దెహ్ ఇచ్చిన పాస్‌ను అందుకున్న అలీ ఒల్వాన్ అద్భుతమైన సోలో రన్‌తో ఆస్ట్రియా రక్షణను ఛేదించి గోల్ సాధించాడు. దీంతో ఫిఫా వరల్డ్‌కప్ చరిత్రలో గోల్ చేసిన తొలి జోర్డానియన్ ఆటగాడిగా ఒల్వాన్ నిలిచాడు. 67వ నిమిషంలో మార్కో ఆర్నాటోవిచ్ గోల్ చేసినా, వీడియో అసిస్టెంట్ రిఫరీ (VAR) సమీక్ష అనంతరం స్టెఫాన్ పోష్ హ్యాండ్‌బాల్ చేసినట్లు తేలడంతో ఆ గోల్‌ను రద్దు చేశారు. దీంతో స్కోరు 1-1తో కొనసాగింది. అయితే కొద్దిసేపటికే ఆస్ట్రియా మళ్లీ ఆధిక్యంలోకి వెళ్లింది. జోర్డాన్ డిఫెండర్ యజాన్ అల్ అరబ్ పొరపాటున తన గోల్‌పోస్ట్‌లోకే బంతిని పంపడంతో ఆస్ట్రియాకు 2-1 ఆధిక్యం లభించింది.

మ్యాచ్ ముగిసే సమయానికి జోర్డాన్ సమం చేయడానికి ప్రయత్నించినప్పటికీ ఫలితం లేకపోయింది. అదనపు సమయంలో ఆస్ట్రియాకు పెనాల్టీ లభించగా.. అనుభవజ్ఞుడు మార్కో ఆర్నాటోవిచ్ ఎలాంటి తప్పు చేయకుండా గోల్‌గా మలిచి జట్టు విజయాన్ని ఖాయం చేశాడు. ఈ విజయంతో ఆస్ట్రియా వరల్డ్‌కప్ 2026 ను ఘనంగా ప్రారంభించగా, జోర్డాన్ పోరాడినప్పటికీ ఓటమితో సరిపెట్టుకోవాల్సి వచ్చింది. మరో ఆసక్తికర విషయం ఏమిటంటే.. ఆస్ట్రియా ఇప్పటివరకు ఆడిన 30 ఫిఫా వరల్డ్‌కప్ మ్యాచ్‌ల్లో ఒక్కటీ గోల్స్ లేకుండా ముగియలేదు.

+3 for Austria 🇦🇹#FIFAWorldCup

— FIFA World Cup (@FIFAWorldCup) June 17, 2026