Russia: ఉక్రెయిన్‌లోని ఆ ప్రాంతాలు నేడే విలీనం.. రష్యా అధికారిక ప్రకటన
- Follow Us :
-
-
Add as a preferred
source on google
Russia: ఉక్రెయిన్ దక్షిణ, తూర్పు ప్రాంతాల్లో ఆక్రమించిన ప్రాంతాలు రష్యాలో శుక్రవారం విలీనం అవుతాయని రష్యా అధ్యక్షుడు వ్లాదిమిర్‌ పుతిన్‌ అధికార ప్రతినిధి దిమిత్రీ పెస్కోవ్ గురువారం ప్రకటించారు. ప్రజాభిప్రాయ సేకరణ ద్వారా ఉక్రెయిన్‌లోని నాలుగు ప్రాంతాలను తాము విలీనం చేసుకుంటున్నట్లు రష్యా అధికారికంగా ప్రకటించింది. శుక్రవారం నిర్వహించే కార్యక్రమంలో ఈ విలీనం ఉంటుందని తెలిపారు. ఈ కార్యక్రమంలో అధ్యక్షుడు పుతిన్‌ పాల్గొంటారని, ఆయా ప్రాంతాలకు చెందిన మాస్కో అనుకూల పరిపాలకులు సంబంధిత ఒప్పందాలపై సంతకాలు చేస్తారని రష్యా ప్రభుత్వ అధికార ప్రతినిధి ప్రకటించారు. గ్రాండ్ క్రెమ్లిన్ ప్యాలెస్‌లోని జార్జియన్ హాల్‌లో మధ్యాహ్నం 3 గంటలకు కొత్త భూభాగాల విలీన వేడుక నిర్వహిస్తామని దిమిత్రీ పెస్కోవ్ తెలిపారు. ఈ కార్యక్రమంలో అధ్యక్షుడు పుతిన్‌ కీలక ప్రసంగం చేస్తారని వివరించారు. రష్యాలో శాశ్వత విలీనాన్ని కోరుకుంటున్నట్లు రెఫరెండంలో వెల్లడైందని రష్యా వర్గాలు వెల్లడించాయి.
రెఫరెండంపై ఉక్రెయిన్ సహా అమెరికా, ఐరోపా దేశాలు అభ్యంతరం వ్యక్తం చేస్తున్నప్పటికీ విలీన ఏర్పాట్లు చకచకా జరిగిపోయాయి. సైనిక అధికారులు, ఎన్నికల అధికారులు ఐదు రోజుల పాటు ఇంటింటీకి వెళ్లి ప్రజాభిప్రాయ సేకరణ నిర్వహించినట్లు తెలుస్తోంది. ఈ నాలుగు ప్రాంతాల్లో రష్యా మద్దతున్న నేతలు తాము రష్యాతోనే ఉంటామని.. త్వరలో పుతిన్‌తో సమావేశమవుతామని వెల్లడించారు. కాగా, 2014లో ఉక్రెయిన్ నుంచి క్రిమియాను రష్యాను ఆక్రమించుకుంది. మళ్లీ ఎనిమిదేళ్ల తర్వాత తాజాగా నాలుగు ప్రాంతాలను ఆక్రమించింది. యుద్ధం వల్ల ఇప్పటికే అత్యధిక ప్రజలు ఇళ్లు వదిలి వెళ్లిపోగా.. మిగిలిన కొద్దిమందితోనే అభిప్రాయ సేకరణ తంతు ముగించారు. ఈ ప్రాంతాల్లో ఉన్న రష్యా సైనికులు తుపాకులతో ఇంటింటికీ వచ్చి ఉక్రెయిన్ వాసులతో బలవంతంగా ఓట్లు వేయించారని ఆరోపించాయి. ఈ నాలుగు ప్రాంతాలు రష్యాలో విలీనం అయితే ఇక ఉక్రెయిన్ తిరిగి స్వాధీనం చేసుకోవడం అసాధ్యం.
Odisha Minister Rita Sahu : తెలంగాణలో చేనేత శైలి అద్భుతం
జపోరిజియా, ఖేర్సన్‌, లుహాన్స్క్‌, డోనెట్స్క్‌ ప్రాంతాలు రష్యాలో విలీనానికి అంగీకారం తెలిపాయని పుతిన్‌ సర్కారు ప్రకటించిన విషయం తెలిసిందే. లిమాన్‌ నగరం సమీపంలోని పలు గ్రామాలను ఉక్రెయిన్ బలగాలు స్వాధీనం చేసుకున్నాయనీ, త్వరలోనే ఆ నగరం మొత్తాన్ని అవి చుట్టుముట్టబోతున్నాయని సమాచారం. ఈ నేపథ్యంలో ‘జాతీయ భద్రత, రక్షణ మండలి’ అత్యవసర సమావేశాన్ని శుక్రవారమే నిర్వహించాలని ఉక్రెయిన్ అధ్యక్షుడు జెలెన్‌స్కీ నిర్ణయించారు. రష్యా ఎత్తుగడలపై దీనిలో చర్చించనున్నారు.