Arshdeep Singh: టీమిండియా స్టార్ లెఫ్ట్ ఆర్మ్ పేసర్ అర్ష్‌దీప్ సింగ్ త్వరలోనే టెస్టు అరంగేట్రం చేసే అవకాశాలు కనిపిస్తున్నాయి. న్యూజిలాండ్ పర్యటనలో వెల్లింగ్టన్, క్రైస్ట్‌చర్చ్ వేదికగా జరగనున్న రెండు టెస్టు మ్యాచ్‌ల కోసం బ్యాకప్ బౌలర్ల జాబితాలో అర్ష్‌దీప్‌ను పరిశీలిస్తున్నట్లు భారత జట్టు బౌలింగ్ కోచ్ మోర్నీ మోర్కెల్ వెల్లడించారు. టీ20ల్లో భారత్ తరఫున అత్యధిక వికెట్లు తీసిన బౌలర్‌గా ఉన్న అర్ష్‌దీప్.. ఇటీవల క్రైస్ట్‌చర్చ్‌లోని హాగ్లీ ఓవల్‌లో న్యూజిలాండ్‌తో జరిగిన రెండో టీ20లో రెండు వికెట్లు తీసి తన 100వ టీ20 మ్యాచ్ మైలురాయిని పూర్తి చేసుకున్నాడు. అంతర్జాతీయ టీ20ల్లో 150 వికెట్ల మైలురాయిని అందుకునేందుకు కేవలం 2 వికెట్ల దూరంలో ఉన్నాడు. ఇప్పటివరకు 18 వన్డేల్లో 30 వికెట్లు తీసినప్పటికీ.. అతనికింకా రెడ్ బాల్ (టెస్టు) ఫార్మాట్‌లో అరంగేట్రం చేసే అవకాశం రాలేదు.
అర్ష్‌దీప్ టెస్టు అవకాశాలపై మోర్కెల్ మీడియాతో మాట్లాడుతూ.. “బిజీ షెడ్యూల్ దృష్ట్యా టెస్టులకు కవర్‌గా లేదా బ్యాకప్‌గా కొంతమంది బౌలర్లను ఇక్కడే ఉంచేందుకు ప్రణాళికలు తయారు చేస్తున్నాం. ప్రస్తుత కాలంలో అక్కడి పరిస్థితులపై స్పష్టత వచ్చాక బౌలింగ్ విభాగం కూర్పుపై తుది నిర్ణయం తీసుకుంటామని.. అన్ని రకాల పిచ్‌ పరిస్థితులకు సరిపోయే బౌలర్ల జాబితా మా వద్ద ఉంది, అందులో అర్ష్‌దీప్ ఖచ్చితంగా ఒకడు. అతను నిరంతరం శ్రమించే బౌలర్. టెస్టు క్రికెట్‌కు కావాల్సిన అన్ని అర్హతలూ అతడిలో ఉన్నాయి. ఒకవేళ రెడ్ బాల్ ఫార్మాట్‌లో అతడి అవసరం వస్తే కచ్చితంగా రాణిస్తాడనే నమ్మకం ఉంది” అని పేర్కొన్నారు. కాగా, డొమెస్టిక్ క్రికెట్‌లో 24 ఫస్ట్ క్లాస్ మ్యాచ్‌లు ఆడిన అర్ష్‌దీప్, 30.71 సగటుతో 73 వికెట్లు పడగొట్టాడు. ఇందులో రెండుసార్లు 5 వికెట్లు, ఒకసారి 4 వికెట్ల ప్రదర్శనలు ఉండగా.. 6/40 అత్యుత్తమ బౌలింగ్ ఫిగర్స్ నమోదయ్యాయి.
న్యూజిలాండ్ టూర్‌లో 5 టీ20లు, 5 వన్డేలు, 2 టెస్టుల సుదీర్ఘ షెడ్యూల్ ఉన్న నేపథ్యంలో బౌలర్ల వర్క్‌లోడ్ మేనేజ్మెంట్‌పై మోర్కెల్ స్పష్టతనిచ్చారు. టెస్టుల కోసం బౌలర్లను తాజాగా ఉంచేందుకు బుమ్రాతో సహా ప్రధాన బౌలర్లందరికీ తగిన విశ్రాంతి, రొటేషన్ విధానాన్ని అమలు చేస్తూ ముందుగానే పటిష్టమైన ప్రణాళికను సిద్ధం చేసుకున్నామని తెలిపారు. వన్డేల్లోనూ మ్యాచ్ ప్రాక్టీస్ కోసం ఆటగాళ్లను మార్చి మార్చి ఆడిస్తామని అన్నారు. నవంబర్ 4 నుంచి వన్డే సిరీస్ ప్రారంభం కానుండగా.. టీ20 జట్టులోని పేసర్లలో అర్ష్‌దీప్ వన్డే స్క్వాడ్‌లోనూ భాగమయ్యాడు. మరోవైపు నవంబర్ 19 నుంచి ప్రారంభమయ్యే టెస్టుల సన్నాహకాల్లో భాగంగా పేసర్లు అన్షుల్ కంబోజ్, ఆకాశ్ దీప్‌లతో పాటు శుభ్‌మన్ గిల్, కేఎల్ రాహుల్, యశస్వి జైస్వాల్, దేవదత్ పడిక్కల్, ధ్రువ్ జురెల్ వంటి రెగ్యులర్ టెస్టు ఆటగాళ్లు మ్యాచ్ ప్రాక్టీస్ కోసం ఇండియా ‘A’ సిరీస్‌లో ఆడుతున్నారు.