Teacher Posts: కీలక నిర్ణయం తీసుకున్న ఏపీ ప్రభుత్వం.. స్కూల్ అసిస్టెంట్లు, హెచ్‌ఎం పోస్టుల కేడర్ ఫిక్స్.

ఉపాధ్యాయుల సర్వీస్ నిబంధనలకు సంబంధించి చంద్రబాబు ప్రభుత్వం కీలక నిర్ణయం తీసుకుంది. రాష్ట్రంలో వివిధ పాఠశాలల్లో పనిచేస్తున్న ఉపాధ్యాయుల కేడర్‌ను ఖరారు చేస్తూ రాష్ట్ర ప్రభుత్వ ప్రధాన కార్యదర్శి సాయిప్రసాద్ అధికారికంగా ఉత్తర్వులు జారీ చేశారు. నూతన జోనల్ విధానం, ప్రభుత్వ మార్గదర్శకాలకు అనుగుణంగా ఉపాధ్యాయ పోస్టులను జిల్లా , జోనల్ కేడర్లుగా స్పష్టంగా విభజించారు.

ప్రభుత్వం జారీ చేసిన జీవోల ప్రకారం.. వివిధ కేటగిరీల ఉపాధ్యాయ పోస్టుల పరిధులను నిర్దేశించారు. జీవో నంబర్ 202 ప్రకారం.. మండల పరిషత్ (ఎంపీపీ), జిల్లా పరిషత్ (జడ్పీ) పాఠశాలల్లో సేవలు అందిస్తున్న స్కూల్ అసిస్టెంట్ పోస్టులను జిల్లా కేడర్ ఉద్యోగులుగా ఖరారు చేశారు. అదేవిధంగా.. జీవో నంబర్ 201 ద్వారా ఉపాధ్యాయ రంగానికి చెందిన సుమారు 27 రకాల వివిధ కేటగిరీల ఉపాధ్యాయ పోస్టులను సైతం జిల్లా కేడర్ పరిధిలోకి తీసుకువస్తున్నట్లు ప్రభుత్వం స్పష్టం చేసింది.

మరోవైపు.. పాఠశాలల నిర్వహణ, పాలనా సౌలభ్యం కోసం ప్రధానోపాధ్యాయుల పోస్టుల విషయంలో ప్రత్యేక నిర్ణయం తీసుకున్నారు. ప్రభుత్వ, ఎంపీపీ అలాగే జడ్పీ పాఠశాలల్లో విధులు నిర్వహిస్తున్న గ్రేడ్-2 ప్రధానోపాధ్యాయుల (హెచ్‌ఎం) పోస్టులను జిల్లా కేడర్ కాకుండా జోనల్ కేడర్‌గా నిర్ధారించారు. ఉపాధ్యాయ సంఘాల విజ్ఞప్తులు, పరిపాలనాపరమైన అంశాలను పరిగణలోకి తీసుకునే ప్రభుత్వం ఈ కేడర్ల విభజనను పూర్తి చేసినట్లు తెలుస్తోంది. ఈ తాజా ఉత్తర్వులతో ఉపాధ్యాయుల బదిలీలు, పదోన్నతులు , సర్వీస్ విషయాల్లో స్పష్టత వచ్చే అవకాశం ఉంది. కేడర్ల ఖరారు ప్రక్రియ పూర్తి కావడంతో విద్యాశాఖలో తదుపరి పరిపాలనా చర్యలకు మార్గం సుగమమైంది.