ఆగ్నేయ బంగాళాఖాతంలో ఏర్పడిన అల్పపీడనం రానున్న కొన్ని గంటల్లోనే మరింత బలపడి తీవ్ర వాయుగుండంగా మారే అవకాశం ఉందని వాతావరణ శాఖ హెచ్చరిస్తోంది. ఈ వాతావరణ వ్యవస్థ మరింత బలపడి సోమవారం నాటికి తీవ్ర తుఫాన్‌గా రూపాంతరం చెంది, ఆ తర్వాత ఆంధ్రప్రదేశ్ తీరం వైపు పయనించే ఛాన్స్ ఉందని అంచనా వేస్తున్నారు. ఈ ముప్పు నేపథ్యంలో తీర ప్రాంత జిల్లాలను అప్రమత్తం చేశారు.
ఈ తుఫాన్ ప్రభావం కారణంగా ఆంధ్రప్రదేశ్‌లో సోమ, మంగళవారాల్లో భారీ నుంచి అతి భారీ వర్షాలు కురిసే అవకాశం ఉంది. ముఖ్యంగా కోస్తా ఆంధ్ర , రాయలసీమ జిల్లాలలో ఈ ప్రభావం ఎక్కువగా కనిపిస్తుందని వాతావరణ నిపుణులు చెబుతున్నారు. తీరం వెంబడి గంటకు 60 నుంచి 80 కిలోమీటర్ల వేగంతో బలమైన ఈదురుగాలులు వీచే అవకాశం ఉండటంతో, సముద్రం అల్లకల్లోలంగా మారనుంది. అందువల్ల మత్స్యకారులు ఎవరూ కూడా వేటకు వెళ్లరాదని అధికారులు స్పష్టంగా హెచ్చరికలు జారీ చేశారు. ఇప్పటికే సముద్రంలో ఉన్న వారు వెంటనే సురక్షిత ప్రాంతాలకు తిరిగి రావాలని సూచించారు.
ఈ తుఫాన్ ముప్పును ఎదుర్కొనేందుకు రాష్ట్ర ప్రభుత్వం ముందస్తు సహాయక చర్యలను ముమ్మరం చేసింది. లోతట్టు ప్రాంతాల ప్రజలను సురక్షిత ప్రాంతాలకు తరలించేందుకు అధికార యంత్రాంగం సిద్ధంగా ఉంది. ఎన్డీఆర్ఎఫ్ (NDRF), ఎస్డీఆర్ఎఫ్ బృందాలను ప్రమాదకర ప్రాంతాలకు పంపే ఏర్పాట్లు జరుగుతున్నాయి. ముఖ్యంగా వ్యవసాయ రంగానికి నష్టం వాటిల్లకుండా రైతులు తగిన జాగ్రత్తలు తీసుకోవాలని అధికారులు సూచిస్తున్నారు. విపత్తు నిర్వహణ శాఖ అన్ని జిల్లాల కలెక్టర్లతో సమీక్ష నిర్వహించి, ఎప్పుడూ అప్రమత్తంగా ఉండాలని ఆదేశాలు జారీ చేసింది. అత్యవసర సహాయం కోసం ప్రత్యేక కంట్రోల్ రూమ్‌లను కూడా ఏర్పాటు చేశారు.