Aadhaar Biometric Update: ఈ రోజుల్లో మన దేశంలో ప్రతీ చిన్నదానికీ, పెద్దదానికీ ఆధారే అత్యంత కీలకమైన గుర్తింపు కార్డుగా మారిపోయింది. పిల్లల నుంచి పండు ముసలి వరకు అందరికీ ఇది తప్పనిసరి. అయితే ఐదేళ్ల కంటే తక్కువ వయసు ఉన్న పిల్లలకి ‘బాల్ ఆధార్’ ఇచ్చేటప్పుడు వారి చేతి వేలిముద్రలు, కంటిపాప (ఐరిస్) స్కాన్ తీసుకోరనే విషయం మనకు తెలిసిందే. పిల్లలకు ఐదేళ్లు నిండిన తర్వాత తొలిసారిగా ఫొటోతో పాటు వేలిముద్రలు, కంటిపాప సమాచారాన్ని ఆధార్లో తప్పనిసరిగా అప్డేట్ చేయించాల్సి ఉంటుంది. ఆ తర్వాత మళ్లీ పదిహేనేళ్ల వయసొచ్చాక రెండోసారి ఈ బయోమెట్రిక్ వివరాలను నవీకరించడం తప్పనిసరి. సాధారణంగా ఏడేళ్ల నుంచి పదిహేనేళ్లు లేదా అంతకంటే ఎక్కువ వయసున్న పిల్లలకు అయ్యే ఈ అప్డేట్ రుసుమును ఒక ఏడాది పాటు మినహాయిస్తూ భారత విశిష్ట గుర్తింపు ప్రాధికార సంస్థ (UIDAI) నిర్ణయం తీసుకుంది. అందువల్ల ప్రస్తుతం 5 నుంచి 17 ఏళ్ల లోపు పిల్లలకు ఈ బయోమెట్రిక్ అప్డేట్ను పూర్తి ఉచితంగా చేసే వెసులుబాటు అందుబాటులో ఉంది.
అయితే ఈ ఉచిత బయోమెట్రిక్ అప్డేట్ సేవలు వచ్చే 2026 సెప్టెంబర్ 30వ తేదీ వరకే అందుబాటులో ఉంటాయని UIDAI స్పష్టం చేసింది. ఈ గడువు దాటిపోతే మాత్రం ఆ తర్వాత మనం జేబులోంచి డబ్బులు చెల్లించి ఫీజు కట్టాల్సి వస్తుంది. కాబట్టి తల్లిదండ్రులు ఏమాత్రం ఆలస్యం చేయకుండా తమ పిల్లలను దగ్గరలోని ఆధార్ ఎన్రోల్మెంట్ సెంటర్కు గానీ, లేదా కామన్ సర్వీస్ సెంటర్ (CSC)కు గానీ తీసుకెళ్లి ఈ పని పూర్తి చేయించవచ్చు. దీనికోసం ఇప్పటికే 1.56 లక్షలకు పైగా బడుల్లో ప్రత్యేక శిబిరాలు ఏర్పాటు చేసి, దాదాపు 2 కోట్లకు పైగా పిల్లల బయోమెట్రిక్స్ అప్డేట్ పూర్తి చేశారు.
ఒకవేళ మీరు ఈ గడువులోగా అప్డేట్ చేయించకపోతే భవిష్యత్తులో చాలా ఇబ్బందులు పడాల్సి వస్తుంది. పిల్లల స్కూళ్లు, కాలేజీల అడ్మిషన్లు, ప్రభుత్వ స్కాలర్షిప్లు, సంక్షేమ పథకాలు మాత్రమే కాకుండా నీట్ (NEET), జేఈఈ (JEE), సీయూఈటీ (CUET) వంటి కీలకమైన పోటీ పరీక్షలు రాసేటప్పుడు ఆధార్ బయోమెట్రిక్ వెరిఫికేషన్ ప్రక్రియలో తీవ్ర సమస్యలు ఎదురయ్యే అవకాశం ఉంది. అందుకే ఈ గడువు ముగిసేలోపే మీ పిల్లల ఆధార్ బయోమెట్రిక్ అప్డేట్ను త్వరపడి పూర్తి చేయడం శ్రేయస్కరం.