దీపావళి పండుగ వేళ కేంద్ర ప్రభుత్వ ఉద్యోగులు, పింఛనుదారులు ఎంతగానో ఎదురుచూస్తున్న వార్త త్వరలోనే వెలువడే అవకాశం ఉంది. డీఏ పెంపునకు సంబంధించి అక్టోబర్ 28న జరిగే కేంద్ర కేబినెట్ సమావేశంలో ప్రభుత్వం కీలక నిర్ణయం తీసుకోనున్నట్లు తెలుస్తోంది. ప్రస్తుతం ఉద్యోగులకు 60 శాతంగా ఉన్న డీఏను మరో 3 శాతం పెంచి 63 శాతానికి చేర్చే యోచనలో ప్రభుత్వం ఉంది. ఒకవేళ ఈ పెంపునకు కేబినెట్ ఆమోదం లభిస్తే.. జూలై 2026 నుంచే ఈ పెరిగిన అలవెన్స్ అమల్లోకి వస్తుంది. దీనివల్ల ఉద్యోగులకు జూలై నుంచి అక్టోబర్ వరకు ఉన్న నాలుగు నెలల బకాయిలు నవంబర్ నెలాఖరు జీతంతో కలిపి వచ్చే అవకాశం ఉంది. అయితే దీనిపై అధికారిక ప్రకటన ఇంకా వెలువడాల్సి ఉంది.
అక్టోబర్ తొలి వారంలోనే ఈ డీఏ పెంపుపై ప్రకటన వస్తుందని ఉద్యోగులు భావించినప్పటికీ, ప్రభుత్వం దసరా, దీపావళి కానుకగా రైల్వే, ఇతర కేంద్ర ఉద్యోగులకు బోనస్‌లు ప్రకటించింది కానీ డీఏపై నిర్ణయం తీసుకోలేదు. తాజాగా ఆల్ ఇండియా న్యూ పెన్షన్ స్కీమ్ ఎంప్లాయీస్ అసోసియేషన్ వర్గాల సమాచారం ప్రకారం అక్టోబర్ 28న జరిగే సమావేశం తర్వాతే ప్రభుత్వం ఈ పెంపును అధికారికంగా వెల్లడించే చాన్స్ ఉంది. జూలై 2025 నుంచి జూన్ 2026 వరకు నమోదైన సగటు వినియోగదారుల ధరల సూచీ ఆధారంగా ఈ 3 శాతం పెంపును ఖరారు చేశారు.
ఈ డీఏ పెంపు వల్ల ఉద్యోగుల నెలవారీ వేతనాల్లో చెప్పుకోదగ్గ మార్పు రానుంది. డీఏ అనేది ప్రతి ఉద్యోగి ప్రాథమిక వేతనం ఆధారంగా లెక్కించబడుతుంది. అంతేకాకుండా.. పెద్ద నగరాల్లో పనిచేసే ఉద్యోగుల రవాణా అలవెన్స్ కూడా దీనికి అనుగుణంగా పెరుగుతుంది. ఉదాహరణకు.. రూ. 47,600 బేసిక్ పే ఉన్న లెవెల్-8 ఉద్యోగికి 3 శాతం డీఏ పెంపు వల్ల నెలకు సుమారు రూ. 1,428 అదనంగా అందుతాయి. దీనికి తోడు రవాణా అలవెన్స్‌లో మరో రూ. 108 పెరిగి, మొత్తంగా నెలకు మంచి వేతన పెరుగుదల లభిస్తుంది. పండుగల సీజన్‌లో ప్రభుత్వం తీసుకోబోయే ఈ నిర్ణయం లక్షలాది మంది కేంద్ర ఉద్యోగులు, పింఛనుదారుల కుటుంబాల్లో కొత్త ఉత్సాహాన్ని నింపనుంది.