Tamil Nadu Love Marriage Case: తమిళనాడులో హృదయ విదారక ఘటన చోటుచేసుకుంది. ప్రేమించిన యువకుడిని వివాహం చేసుకున్న 19 ఏళ్ల యువతిని ఇంటికి తీసుకెళ్లేందుకు తల్లిదండ్రులు పోలీస్ స్టేషన్లోనే కాళ్లపై పడి వేడుకున్నప్పటికీ, ఆమె తన భర్తతోనే వెళ్లాలని నిర్ణయించుకుంది. ఈ ఘటన తిరుపత్తూరు జిల్లాలో భావోద్వేగ వాతావరణాన్ని సృష్టించింది. తిరుపత్తూరు జిల్లాలోని జోలార్పేట సమీపంలోని కటేరి ప్రాంతానికి చెందిన కాళి, ప్రవీణ దంపతుల కుమార్తె దివ్యదర్శిని (19) కృష్ణగిరిలోని ఓ ప్రైవేట్ ఇంజినీరింగ్ కళాశాలలో మూడో సంవత్సరం చదువుతోంది.
ఆమెకు జోలార్పేట సమీపంలోని అమ్మయ్యప్పన్ నగర్కు చెందిన పెరుమాల్ (23)తో గత మూడు సంవత్సరాలుగా పరిచయం ఏర్పడి, అది ప్రేమగా మారింది. పెరుమాల్ స్థానికంగా లౌడ్స్పీకర్ సేవా కేంద్రాన్ని నిర్వహిస్తున్నట్లు సమాచారం.
ప్రేమకు తల్లిదండ్రుల వ్యతిరేకత
దివ్యదర్శిని ప్రేమ వ్యవహారం గురించి తెలుసుకున్న తల్లిదండ్రులు ఆ సంబంధాన్ని వ్యతిరేకించారు. అయినప్పటికీ, ఈ నెల 4వ తేదీన దివ్యదర్శిని ఇంటి నుంచి వెళ్లిపోయి, పెరుమాల్ను వివాహం చేసుకుంది. ఇద్దరూ ఏలగిరి కొండలలోని మురుగన్ ఆలయంలో వివాహం చేసుకున్న అనంతరం రక్షణ కోసం తిరుపత్తూరు ఆల్ ఉమెన్ పోలీస్ స్టేషన్ను ఆశ్రయించారు.
పోలీస్ స్టేషన్లో భావోద్వేగ సన్నివేశం
విషయం తెలుసుకున్న పోలీసులు ఇరు కుటుంబాలను రాజీ చర్చల కోసం పోలీస్ స్టేషన్కు పిలిచారు. కుమార్తెను చూసిన వెంటనే తల్లిదండ్రులు భావోద్వేగానికి గురై కన్నీటి పర్యంతమయ్యారు. తమ కుమార్తెను ఇంటికి తిరిగి రావాలని పలుమార్లు వేడుకున్నారు. కుటుంబ సభ్యులు కూడా ఆమె నిర్ణయాన్ని మార్చుకునేలా ప్రయత్నించారు.
కాళ్లపై పడి వేడుకున్న తల్లిదండ్రులు
అయితే దివ్యదర్శిని తన నిర్ణయాన్ని మార్చుకోలేదు. దీంతో తల్లి, తండ్రి ఇద్దరూ కుమార్తె కాళ్లపై పడి “మాతో ఇంటికి రా బిడ్డా” అంటూ వేడుకున్నట్లు అక్కడున్నవారు తెలిపారు. ఈ దృశ్యం అక్కడ ఉన్న వారిని తీవ్ర భావోద్వేగానికి గురిచేసింది. పోలీసులు చట్టపరమైన ప్రక్రియను పూర్తి చేసిన అనంతరం, దివ్యదర్శిని తన స్వచ్ఛంద నిర్ణయం మేరకు భర్త పెరుమాల్తో వెళ్లాలని తెలిపింది. ఆమె వయోజనురాలు కావడంతో, పోలీసులు ఆమె నిర్ణయాన్ని గౌరవించి భర్తతో వెళ్లేందుకు అనుమతించారు. అనంతరం తల్లిదండ్రులు, బంధువులు తీవ్ర ఆవేదనతో అక్కడి నుంచి వెళ్లిపోయారు.
చట్టపరమైన అంశం
భారత చట్టాల ప్రకారం, 18 సంవత్సరాలు దాటిన మహిళ తనకు నచ్చిన వ్యక్తిని వివాహం చేసుకునే హక్కు కలిగి ఉంటుంది. బలవంతం లేదా బెదిరింపులు లేనప్పుడు, ఆమె స్వచ్ఛంద నిర్ణయాన్ని పోలీసులు, న్యాయవ్యవస్థ గౌరవిస్తాయి. ఈ ఘటనలో కూడా అదే విధానాన్ని అధికారులు అనుసరించినట్లు సమాచారం.
Love Over Family? 💔
A heartbreaking incident unfolded in Tirupattur, Tamil Nadu, where a young woman chose to leave with her boyfriend despite her parents' emotional pleas. In tearful scenes, her parents were seen crying and even falling at her feet in a desperate attempt to… pic.twitter.com/wHY2TxFT6T
— Orugallu Adda (@OrugalluAdda) July 8, 2026