Varanasi Airport Gunfire: ఎయిర్‌పోర్టులో కాల్పుల కలకలం.. లైసెన్స్‌డ్ పిస్టల్ పేలడంతో ఇద్దరు సిబ్బందికి గాయాలు

వారణాసి లాల్ బహదూర్ శాస్త్రి అంతర్జాతీయ విమానాశ్రయంలో ఆదివారం ఉదయం భద్రతా తనిఖీల సమయంలో కాల్పులు కలకలం రేపాయి. ముంబై వెళ్లాల్సిన ఓ ప్రయాణికుడి వద్ద ఉన్న లైసెన్స్‌డ్ తుపాకీ నుంచి రౌండ్ పేలడంతో ఇద్దరు భద్రతా సిబ్బంది గాయపడ్డారు. ఈ ఘటనపై అధికారులు దర్యాప్తు ప్రారంభించారు. విమానాశ్రయానికి వచ్చిన ప్రయాణికుడు తన వద్ద ఉన్న లైసెన్స్‌డ్ ఆయుధాన్ని నిబంధనల ప్రకారం తనిఖీకి సమర్పించాడు. ఈ సమయంలో ఆయుధాన్ని పరిశీలిస్తుండగా అనుకోకుండా తుపాకీ నుంచి ఓ రౌండ్ పేలినట్లు అధికారులు తెలిపారు. ప్రాథమిక సమాచారం ప్రకారం, ప్రయాణికుడు తన భార్యతో కలిసి ముంబై వెళ్లే ఎయిర్ ఇండియా ఎక్స్‌ప్రెస్ విమానం IX-1810 ఎక్కేందుకు విమానాశ్రయానికి వచ్చినట్లు అధికారులు తెలిపారు.

ఇద్దరు సిబ్బందికి గాయాలు

కాల్పుల ఘటనలో ఇద్దరు AAICLAS భద్రతా స్క్రీనర్లు గాయపడ్డారు. వారిని వెంటనే చికిత్స కోసం ఆసుపత్రికి తరలించారు. ఒక ఉద్యోగికి బుల్లెట్ తగలగా, మరో ఉద్యోగికి గాయాలు అయినట్లు సమాచారం. ఘటన అనంతరం విమానాశ్రయంలో భద్రతా సిబ్బంది అప్రమత్తమయ్యారు. కాల్పులు జరిగిన వెంటనే భద్రతా సంస్థలు సంబంధిత ప్రయాణికుడిని అదుపులోకి తీసుకుని విచారించడం ప్రారంభించాయి. తుపాకీ విమానాశ్రయానికి ఎలా తీసుకువచ్చారు, ఆయుధ తనిఖీ సమయంలో భద్రతా ప్రోటోకాల్‌లు ఎలా అమలయ్యాయి అనే అంశాలపై అధికారులు దర్యాప్తు చేస్తున్నారు. ఈ ఘటనకు సంబంధించి ఆయుధాన్ని తనిఖీ చేసే సమయంలో నిర్దేశిత భద్రతా విధానాలు పాటించబడ్డాయా లేదా అనే విషయాన్ని కూడా పరిశీలిస్తున్నారు.

భద్రతా నిబంధనలపై మరోసారి చర్చ

విమాన ప్రయాణాల్లో లైసెన్స్‌డ్ ఆయుధాలను తీసుకెళ్లేందుకు ప్రత్యేక నిబంధనలు ఉంటాయి. ఆయుధాలను ప్రయాణికులు సాధారణంగా తమ వద్ద ఉంచకుండా నిర్దేశిత విధానంలో తనిఖీ చేసి, సురక్షితంగా విమానంలో తరలించాల్సి ఉంటుంది. వారణాసి విమానాశ్రయంలో జరిగిన ఈ ఘటన నేపథ్యంలో ఆయుధాల తనిఖీ, వాటి నిర్వహణ, భద్రతా సిబ్బంది అనుసరించే ప్రోటోకాల్స్‌పై మరోసారి ప్రశ్నలు తలెత్తాయి. ప్రస్తుతం ఘటనకు సంబంధించిన పూర్తి వివరాలు, కాల్పులు ఏ పరిస్థితుల్లో జరిగాయనే అంశంపై దర్యాప్తు కొనసాగుతోంది.