అక్టోబర్ 15 నుంచి అమల్లోకి రానున్న యూపీఐ చెల్లింపులు వాయిదా పడ్డాయి. కీలక పండుగల నేపథ్యంలో కొత్త ఛార్జీలు వాయిదా పడ్డాయి. దీపావళి వరకు వాయిదా వేసినట్లు నేషనల్ పేమెంట్స్ కార్పొరేషన్ ఆఫ్ ఇండియా (NPCI) మంగళవారం తెలిపింది. రూ.2,000కు మించిన కొన్ని యూపీఐ లావాదేవీలపై మర్చంట్ డిస్కౌంట్ రేట్‌ (MDR) విధించే ప్రతిపాదనను దీపావళి తర్వాత అమలు చేయనున్నట్లు ప్రకటించింది. పండుగ సీజన్‌లో వ్యాపారులు, వినియోగదారులకు ఇబ్బందులు కలగకుండా ఉండేందుకు ఈ నిర్ణయం తీసుకున్నట్లు తెలిపింది.
అక్టోబర్ 13న విడుదల చేసిన ప్రకటన ప్రకారం.. ఎంపిక చేసిన వ్యక్తి నుంచి వ్యాపారికి జరిగే చెల్లింపులపై MDR ఛార్జీలను దీపావళి తర్వాత వెంటనే అమలు చేయాలని యూపీఐ అండ్ సర్వీసెస్ స్టీరింగ్ కమిటీ నిర్ణయించింది. అయితే ఈ ఛార్జీలు ఏ తేదీ నుంచి అమల్లోకి వస్తాయన్నది మాత్రం స్పష్టం చేయలేదు. ఎంపిక చేసిన యూపీఐ లావాదేవీలపై ఛార్జీలు అక్టోబర్ 15 నుంచి అమల్లోకి వస్తాయని గతంలో వార్తలు వచ్చాయి. అయితే పండుగ సీజన్‌లో డిజిటల్ చెల్లింపులు భారీగా పెరిగే అవకాశం ఉండటంతో.. వ్యాపార సంఘాలు, ఫిన్‌టెక్ సంస్థలు, చెల్లింపుల సేవల కంపెనీలు అమలును వాయిదా వేయాలని కోరినట్లు సమాచారం. ఈ నేపథ్యంలో NPCI ప్రతిపాదనను వాయిదా వేయడంపై పరిశీలన జరిపింది.
ప్రతిపాదిత విధానం ప్రకారం.. ఎంపిక చేసిన రూ.2,000కు మించిన యూపీఐ లావాదేవీలపై 0.4 శాతం MDR ఛార్జీ విధించే అంశం ఉంది. ఉదాహరణకు, రూ.10,000 చెల్లింపుపై 0.4 శాతం లెక్కన రూ.40 ఛార్జీ అవుతుంది. అయితే ఈ ఛార్జీలు అన్ని యూపీఐ లావాదేవీలకు వర్తిస్తాయని భావించకూడదు. NPCI ప్రకటన ప్రకారం ఇవి ఎంపిక చేసిన వ్యాపార చెల్లింపులకు మాత్రమే సంబంధించినవి. ఏ రకమైన లావాదేవీలకు ఛార్జీలు వర్తిస్తాయి? ఏ వ్యాపార వర్గాలకు ఏ రేట్లు అమలు చేస్తారు? వంటి అంశాలపై మరింత స్పష్టత రావాల్సి ఉంది.