UP Election 2027: ‘‘5 తరాల వరకు ప్రధాని కాలేరు’’.. గాంధీ కుటుంబంపై ఎస్పీ నేత సెటైర్లు..

UP Election 2027: వచ్చే ఏడాది మొదల్లో ఉత్తర్ ప్రదేశ్ అసెంబ్లీ ఎన్నికలు జరగబోతునున్నాయి. ఈ నేపథ్యంలో పార్టీలు ప్రచార పర్వాన్ని ఇప్పుడే ప్రారంభించాయి. ఇదిలా ఉంటే, సీట్ల పంపకాల్లో మాత్రం సమాజ్‌వాదీ పార్టీ(ఎస్పీ), కాంగ్రెస్ పార్టీ మధ్య తీవ్ర విభేదాలు ఏర్పడింది. 150 పైగా సీట్లు కావాలని కాంగ్రెస్ డిమాండ్ చేస్తున్న నేపథ్యంలో ఎస్పీ నేత ఐపీ సింగ్ తీవ్రంగా విమర్శించారు. ‘‘లూటియన్స్ కాంగ్రెస్ వాళ్లు యూపీలో మొత్తం 403 స్థానాల్లో పోటీ చేస్తారు. రాబోయే 5 తరాల వరకు ఏ గాంధీ అని పిలువబడే వ్యక్తి ప్రధానమంత్రి కాలేరు. 1989 నుంచి గాంధీ కుటుంబం ప్రధాని పదవిని చేపట్టలేదు. రాబోయే అనేక దశాబ్ధాల్లో కూడా ఇదే జరుగుతుంది’’ అని తీవ్ర స్థాయితో ఐపీ సింగ్ ధ్వజమెత్తారు. కాంగ్రెస్ నేతలు ఢిల్లీలో కూర్చుని పగటి కలలు కంటున్నారని వెక్కిరించారు.

కాంగ్రెస్ వ్యూహాకర్తలను టార్గెట్ చేస్తూ… యూపీలో కాంగ్రెస్‌కు అంత బలం ఉంటే 403 స్థానాల్లో ఒంటరిగా పోటీ చేసి తన బలాన్ని ఎందుకు పరీక్షించుకోకూడదు.? అని ప్రశ్నించారు. పొత్తులు, రాజకీ పరిణామాలనే ఊతకర్రలతో ప్రజల్ని తప్పుదోవ పట్టించే ప్రయత్నాలు ఇంకెంత కాలం సాగుతాయి? రాహుల్ గాంధీ రాజకీయాల్లోకి ప్రవేశించి రెండున్నర దశాబ్ధాలు గడిచాయని, తరాలు మారాయి, కానీ కాంగ్రెస్ ఇప్పటికీ అవే ప్రశ్నల్ని ఎదుర్కొంటోందని ఘాటుగా స్పందించారు. కాంగ్రెస్ సాధించింది ఏంటని ప్రశ్నించారు. కేవలం కెమెరాలు, వేదికలు, పెద్ద పెద్ద ప్రకటనలు మాత్రమే రాజకీయ పునాదిని నిర్మించలేదని హితవు చెప్పారు. క్షేత్రస్థాయిలో పార్టీ కార్యకర్తల బలం, ఓటర్లతో నిరంతర సంబంధం రాజకీయ సంస్థకు అసలైన బలమని అన్నారు.

ఉత్తర్ ప్రదేశ్ ఎన్నికల్లో కాంగ్రెస్, ఎస్పీ కలిసి పోటీ చేయాలని భావిస్తున్నాయి. ఈ నేపథ్యంలో 403 స్థానాల్లో 150 స్థానాలు మాకు దక్కాలని కాంగ్రెస్ కోరుకుంటోంది. 100కు సీట్ల సంఖ్య తగ్గకూడదనే నిర్ణయంపై ఆ పార్టీ ఉంది. ఇక ఎస్పీ 80 సీట్లు ఇవ్వాలని భావిస్తోంది. దీంతో రెండు పార్టీల మధ్య విభేదాలు కనిపిస్తున్నాయి.