RG Kar Case: సుప్రీంకోర్టులో బాధిత తల్లిదండ్రులకు చుక్కెదురు

దేశ వ్యాప్తంగా సంచలనం సృష్టించిన కోల్‌కతా ఆర్జీకర్ ఆస్పత్రిలో వైద్యురాలి అత్యాచార ఘటనలో బాధిత తల్లిదండ్రులకు దేశ సర్వోన్నత న్యాయస్థానంలో చుక్కెదురైంది. ఇటీవలే నిందితుడు సంజయ్ రాయ్‌కు కోల్‌కతా ప్రత్యేక కోర్టు జీవిత ఖైదీ విధించింది. అయితే ఈ కేసును మళ్లీ సీబీఐతో విచారణ జరిపించాలని బాధిత తల్లిదండ్రులు సుప్రీం ధర్మాసనాన్ని ఆశ్రయించారు. సోమవారం న్యాయస్థానం ఈ పిటిషన్‌ను కొట్టేసింది. అయితే కోల్‌కతా హైకోర్టులో మాత్రం ఈ పిటిషన్‌ను కొనసాగించాలని సుప్రీంకోర్టు ప్రధాన న్యాయమూర్తి సంజీవ్ ఖన్నా.. మృతురాలి పేరెంట్స్‌కు సూచించారు.

ఇది కూడా చదవండి: Phone: స్మార్ట్‌ఫోన్ వాడకుంటే.. పరిశోధనలో ఏం తేలింది తెలుసా !

2024, ఆగస్టు 9న కోల్‌కతా ఆర్జీకర్ ఆస్పత్రిలో నైట్‌డ్యూటీలో ఉండగా జూనియర్ వైద్యురాలిపై సివిల్ వాలంటీర్ సంజయ్ రాయ్ అఘాయిత్యానికి పాల్పడి చంపేశాడు. ఈ ఘటన దేశాన్ని కుదిపేసింది. ఇక పోలీసులు కేసు నమోదు చేసి సంజయ్ రాయ్‌ను అరెస్ట్ చేశారు. ఇటీవలే నిందితుడికి జీవిత ఖైదీ పడింది. అయితే నిందితుడికి మరణశిక్ష విధించాలని పశ్చిమ బెంగాల్ ప్రభుత్వం కోల్‌కతా హైకోర్టును ఆశ్రయించింది. ఈ పిటిషన్ స్వీకరించేందుకు న్యాయస్థానం నిరాకరించింది. అయితే ఈ విషయంలో తమకే హక్కు ఉందని సీబీఐ పేర్కొంది. నిందితుడికి మరణశిక్ష పడేలా తామే కోరతామని సీబీఐ తెలిపింది. సీబీఐ అప్పీల్‌ను మాత్రం కోర్టు అంగీకరించింది. తాజాగా మృతురాలి తల్లిదండ్రులకు కూడా హైకోర్టులోనే చూసుకోవాలని సుప్రీంకోర్టు సూచించింది.

ఇది కూడా చదవండి: Orry: చిక్కుల్లో ఓర్రీ.. వైష్ణో దేవి ఆలయం దగ్గర మద్యం సేవించడంపై ఎఫ్ఐఆర్