కాంగ్రెస్ అగ్ర నాయకురాలు సోనియాగాంధీకి న్యాయస్థానం షాకిచ్చింది. భారత పౌరసత్వంపై మళ్లీ ఇబ్బందుల్లో పడ్డారు. భారత పౌరసత్వం పొందకముందే ఓటర్ జాబితాలో పేరు నమోదు కావడంపై ఢిల్లీ సెషన్స్ కోర్టు కీలక ఆదేశాలు జారీ చేసింది. ఎఫ్ఐఆర్ నమోదు చేయడానికి నిరాకరిస్తూ మెజిస్ట్రేట్ కోర్టు ఇచ్చిన ఉత్తర్వులను సోమవారం సెషన్స్ కోర్టు కొట్టేసింది. దీంతో సోనియాగాంధీకి షాక్ తగిలినట్లైంది.
పిటిషన్పై మళ్లీ విచారణ
2025 సెప్టెంబర్లో మెజిస్ట్రేట్ కోర్టు ఇచ్చిన ఆదేశాలను తాజాగా సెషన్స్ కోర్టు జడ్జి విషా గోగ్నే కొట్టివేశారు. ఈ పిటిషన్ను తాజాగా మరోసారి విచారించి నిర్ణయం తీసుకోవాలని ఆదేశించారు. పిటిషనర్ వికాస్ త్రిపాఠి, ఢిల్లీ పోలీసుల వాదనలు పూర్తిగా విన్న తర్వాత కారణాలతో కూడిన ఉత్తర్వులు జారీ చేయాలని మెజిస్ట్రేట్ను సూచించారు.
అసలు పిటిషన్ ఎవరిది?
రౌస్ అవెన్యూ కోర్టుల సెంట్రల్ ఢిల్లీ కోర్ట్ బార్ అసోసియేషన్ ఉపాధ్యక్షుడు, న్యాయవాది వికాస్ త్రిపాఠి ఈ ఫిర్యాదును దాఖలు చేశారు. సోనియా గాంధీ భారత పౌరసత్వం పొందకముందే ఆమె పేరు ఓటర్ల జాబితాలో చేర్చారన్న ఆరోపణలపై FIR నమోదు చేయాలని ఆయన కోరారు. మెజిస్ట్రేట్ కోర్టు ఉత్తర్వుల్లో చట్టపరమైన లోపం ఉందని సెషన్స్ కోర్టు పేర్కొంది. ముఖ్యంగా భారతీయ నాగరిక్ సురక్షా సంహిత (BNSS)లోని సెక్షన్ 175(3) నిబంధనలను సరిగ్గా పాటించలేదని జడ్జి తెలిపారు. సంబంధిత పోలీసు అధికారి వాదనలు వినకపోవడం, పోలీస్ స్టేషన్ నుంచి స్టేటస్ రిపోర్ట్ తీసుకోకపోవడం వంటి అంశాలను కోర్టు ప్రస్తావించింది. ఈ నేపథ్యంలో గతంలో ఇచ్చిన ఉత్తర్వులను పక్కనపెట్టి, ఫిర్యాదుపై చట్ట ప్రకారం మళ్లీ విచారణ జరిపి నిర్ణయం తీసుకోవాలని ఢిల్లీ సెషన్స్ కోర్టు ఆదేశించింది.