Rahul Gandhi vs PM Modi: లోక్‌సభలో ప్రతిపక్ష నేత, కాంగ్రెస్ అగ్రనేత రాహుల్ గాంధీ ప్రధాని నరేంద్ర మోడీపై సంచలన ఆరోపణలు చేశారు. తన ఫోన్‌ను ప్రధాని మోడీ ట్యాప్ చేస్తున్నారని ఆరోపిస్తూ, మరోసారి ప్రధానికి ముఖాముఖి బహిరంగ చర్చకు సవాల్ విసిరారు. శుక్రవారం ప్రముఖ ఫొటో షేరింగ్ ప్లాట్‌ఫామ్ ఇన్‌స్టాగ్రామ్‌లో నిర్వహించిన ప్రశ్నోత్తరాల కార్యక్రమంలో ఓ ప్రశ్నకు సమాధానం ఇస్తూ రాహుల్ గాంధీ ఈ వ్యాఖ్యలు చేశారు. అయితే తన ఫోన్ ట్యాప్ అవుతోందన్న ఆరోపణలకు ఆయన ఎలాంటి ఆధారాలను బహిరంగంగా సమర్పించలేదు.
‘ఆధారాలన్నీ నా ఫోన్‌లోనే ఉన్నాయి’
ప్రధాని మోడీ విదేశీ శక్తుల నియంత్రణలో ఉన్నారని తాను చేసిన ఆరోపణలకు ఆధారాలేమిటని ఓ వ్యక్తి ప్రశ్నించగా, రాహుల్ గాంధీ తన ఫోన్‌ను చూపిస్తూ స్పందించారు. “ఆధారం ఇక్కడే ఉంది.. ఈ ఫోన్‌లోనే ఉంది. ప్రధానికి కూడా తెలుసు, ఎందుకంటే ఆయన నా ఫోన్‌ను ట్యాప్ చేస్తున్నారు. ఆయన చర్చకు వచ్చిన వెంటనే ఎవరు విదేశీ శక్తుల నియంత్రణలో ఉన్నారు? ఎవరు దేశ వ్యతిరేకిగా ఉన్నారు? ఎప్పటి నుంచి ఉన్నారు? నాకు తెలిసిన అనేక విషయాలు ప్రజలకు తెలుస్తాయి” అని రాహుల్ గాంధీ వ్యాఖ్యానించినట్లు సమాచారం.
మరోసారి ముఖాముఖి చర్చకు సవాల్
ప్రధాని నరేంద్ర మోడీతో ఒకరిపై ఒకరు బహిరంగంగా చర్చకు సిద్ధమని రాహుల్ గాంధీ మరోసారి సవాల్ విసిరారు. తాను చేస్తున్న ఆరోపణలకు సంబంధించి బహిరంగ చర్చ జరగాలని ఆయన చాలాకాలంగా డిమాండ్ చేస్తున్న విషయం తెలిసిందే. ఈసారి కూడా ప్రధాని మోడీ చర్చకు వస్తే అనేక అంశాలపై నిజాలు బయటపడతాయని రాహుల్ గాంధీ పేర్కొన్నారు.
రాహుల్ గాంధీ చేసిన ఫోన్ ట్యాపింగ్ ఆరోపణలు దేశ రాజకీయాల్లో కొత్త వివాదానికి దారితీసే అవకాశం ఉంది. ముఖ్యంగా లోక్‌సభలో ప్రతిపక్ష నేత హోదాలో ఉన్న రాహుల్ గాంధీ ఈ తరహా ఆరోపణలు చేయడం రాజకీయ వర్గాల్లో చర్చనీయాంశంగా మారింది.