Maharashtra: మహా దారుణం.. వివాహితపై భర్త స్నేహితులు గ్యాంగ్‌రేప్

మహారాష్ట్రలోని పాల్ఘర్ జిల్లాలో దారుణ ఘటన వెలుగులోకి వచ్చింది. భర్త ఇంట్లో లేని సమయంలో అతడి స్నేహితులైన ఇద్దరు వ్యక్తులు వివాహితపై సామూహిక లైంగిక దాడికి పాల్పడ్డారు. ఎవరికైనా చెబితే నాలుగేళ్ల కుమారుడిని చంపేస్తామని బెదిరించారు. అక్టోబర్ 8 రాత్రి జరిగిన ఘటన ఆలస్యంగా వెలుగులోకి వచ్చింది. ఈ ఘటనకు సంబంధించి ఇద్దరు నిందితులను పోలీసులు అరెస్టు చేశారు.

పోలీసుల వివరాల ప్రకారం.. అక్టోబర్ 8 రాత్రి మహిళ భర్త ఇంట్లో లేని సమయంలో ఇద్దరు నిందితులు ఇంట్లోకి వచ్చి వివాహితపై లైంగిక దాడికి పాల్పడ్డారు. అనంతరం ఈ విషయం ఎవరికైనా చెబితే ఆమె నాలుగేళ్ల కుమారుడిని చంపేస్తామని బెదిరించి అక్కడి నుంచి పారిపోయినట్లు సీనియర్ పోలీసు ఇన్‌స్పెక్టర్ లాలు తురే తెలిపారు. బాధితురాలు ఇచ్చిన ఫిర్యాదు ఆధారంగా విరార్ పోలీసులు శుక్రవారం సూరజ్ యాదవ్, విశాల్ అనే ఇద్దరిని అరెస్టు చేశారు. భారతీయ న్యాయ సంహిత (BNS)లోని సంబంధిత సెక్షన్ల కింద కేసు నమోదు చేసినట్లు అధికారులు తెలిపారు.

అరెస్టు చేసిన నిందితులను స్థానిక కోర్టులో హాజరుపరచగా.. న్యాయస్థానం వారికి నాలుగు రోజుల పోలీసు కస్టడీ విధించింది. ఈ ఘటనకు సంబంధించిన పూర్తి వివరాలను తెలుసుకునేందుకు పోలీసులు దర్యాప్తు కొనసాగిస్తున్నారు. నిందితులు బాధితురాలి భర్తకు స్నేహితులని, గతంలో తరచూ వారి ఇంటికి వచ్చేవారని పోలీసులు తెలిపారు. చిన్నారిని చంపేస్తామని బెదిరించినట్లు వచ్చిన ఆరోపణలపైనా దర్యాప్తు చేస్తున్నారు.