Monkeypox: యూరప్ రకానికి భిన్నంగా ఇండియా మంకీపాక్స్ వైరస్
Monkeypox In India: ప్రపంచాన్ని మంకీపాక్స్ వైరస్ కలవరానికి గురిచేస్తోంది. ఇప్పటికే 78కు పైగా దేశాల్లో 18 వేల కేసులు నమోదు అయ్యాయి. ముఖ్యంగా యూరప్, అమెరికా దేశాలు ఈ వ్యాధికి ఎక్కువగా గురువుతున్నాయి. ఒక్క యూరప్ దేశాల్లోనే 70 శాతం కేసులు నమోదు అవ్వగా.. 25 శాతం కేసులు అమెరికా ప్రాంతంలో నమోదు అయ్యాయి.ఇక ఇండియాలో కూడా ఇప్పటికే 4 మంకీపాక్స్ వైరస్ కేసులు వెలుగులోకి వచ్చాయి. ఇందులో కేరళలో మూడు, ఢిల్లీలో ఒక కేసు నమోదు అయింది. అయితే దేశవ్యాప్తంగా మంకీపాక్స్ అనుమానితుల సంఖ్య క్రమంగా పెరుగుతోంది.
ఇదిలా ఉంటే ఇండియాలో మంకీపాక్స్ వైరస్ రకం..యూరోపియన్ రకంతో పోలీస్తే భిన్నంగా ఉందని..సైంటిస్టులు కనుక్కున్నారు. పుణెలోని ఇండియన్ కౌన్సిల్ ఆఫ్ మెడికల్ రీసెర్చ్-నేషనల్ ఇన్స్టిట్యూట్ ఆఫ్ వైరాలజీ (ఐసీఎంఆర్-ఎన్ఐవీ) శాస్త్రవేత్తలు.. రెండు రకాల వైరస్ జన్యుక్రమాన్ని విశ్లేషించారు. ప్రస్తుతం ఇండియాలోని మంకీపాక్స్ వైరస్ ఏ.2 రకానికి చెందినదిగా గుర్తించారు. ఇది మిడిల్ ఈస్ట్ నుంచి భారత్ కు వచ్చింది. అంతకుముందు ఈ రకం థాయ్ లాండ్, యూఎస్ లో 2021లో వ్యాధి వ్యాప్తికి కారణం అయింది.
Read Also: Karnataka: ఇక ఎన్ కౌంటర్లే అంటూ.. కర్ణాటక మంత్రి సంచలన వ్యాఖ్యలు
యూరప్ దేశాల్లో మంకీపాక్స్ వ్యాధి తీవ్రమైన వ్యాప్తికి కారణం అవుతున్న వైరస్ బీ.1 రకానికి చెందినదిగా గుర్తించారు. ఈ వైరస్ రకమే యూరప్ లోని వ్యాధి పెరగడానికి కారణం అవుతోంది. ప్రస్తుతం ప్రపంచంలో ఉన్న కేసుల్లో ఎక్కువగా ఈ బీ.1 రకానికి చెందిన మంకీపాక్స్ వైరస్ వల్లే కలుగుతున్నాయి. బీ.1, ఏ2 రకానికి పూర్తిగా విభిన్నంగా ఉన్నట్లు శాస్త్రవేత్తలు గుర్తించారు. ఇప్పటికే ఈ వ్యాధిపై ప్రపంచ ఆరోగ్య సంస్థ( డబ్ల్యూహెచ్ఒ) గ్లోబల్ హెల్త్ ఎమర్జెన్సీని ప్రకటించింది. కొద్ది సమయంలోనే అనేక కేసులు నమోదు అవ్వడంతో ఈ నిర్ణయం తీసుకుంది డబ్ల్యూహెచ్ఓ.