CM MK Stalin Loses: తమిళనాడు రాజకీయ చరిత్రలో అరుదైన, అత్యంత సంచలనాత్మకమైన ఘట్టం నమోదైంది. గత పదిహేనేళ్లుగా ఎదురులేని నాయకుడిగా, సిట్టింగ్ ముఖ్యమంత్రిగా ఉన్న ఎం.కె.స్టాలిన్ తన సొంత నియోజకవర్గమైన కొలత్తూరులో ఘోర పరాజయాన్ని చవిచూశారు. నటుడు విజయ్ స్థాపించిన తమిళగ వెట్రి కళగం (TVK) అభ్యర్థి వి.ఎస్. బాబు, ముఖ్యమంత్రి స్టాలిన్పై సుమారు 4,000 ఓట్ల ఆధిక్యంతో సంచలన విజయం సాధించారు. 2011 నుంచి వరుసగా మూడుసార్లు కొలత్తూరు నియోజకవర్గం నుంచి గెలుస్తూ వస్తున్న స్టాలిన్కు ఓటర్లు ఈసారి షాక్ ఇచ్చారు. నియోజకవర్గంలో ఆయన చేసిన అభివృద్ధి పనుల కంటే, రాష్ట్రవ్యాప్తంగా వచ్చిన ప్రభుత్వ వ్యతిరేకత, మార్పు కోరుకునే యువ ఓటర్ల నిర్ణయం స్టాలిన్ కొంపముంచినట్లు కనిపిస్తోంది. ఒక ముఖ్యమంత్రి తన సొంత నియోజకవర్గంలోనే కొత్త పార్టీ అభ్యర్థి చేతిలో ఓడిపోవడం దేశవ్యాప్తంగా చర్చనీయాంశమైంది.
విజయ్ ‘విక్టరీ’ కేవలం సినిమాటిక్ కాదు..
ఈ ఫలితం ద్వారా ‘దళపతి’ విజయ్ రాజకీయ ప్రవేశం కేవలం ఒక గాలివాటం కాదని, అది ఒక శక్తివంతమైన ప్రభంజనమని రుజువైంది. టీవీకే పార్టీ అభ్యర్థి వి.ఎస్.బాబు అట్టడుగు స్థాయి నుంచి ప్రచారం నిర్వహించి, అధికార పార్టీ యంత్రాంగాన్ని ఎదిరించి గెలవడం గమనార్హం. ఈ ఓటమికి ప్రధాన కారణం.. దశాబ్దాలుగా ద్రవిడ పార్టీల మధ్యే సాగుతున్న అధికారాన్ని ఈసారి కొత్త శక్తికి అప్పగించాలని కొలత్తూరు ఓటర్లు నిర్ణయించుకోవడం అని విశ్లేషకులు అభిప్రాయం వ్యక్తం చేశారు. మొదటిసారి ఓటు వేస్తున్న యువత, విద్యావంతులు విజయ్ నినాదాలకు ఆకర్షితులు కావడం కూడా ఈ ఓటమికి ప్రధాన కారణంగా చెబుతున్నారు. అలాగే క్షేత్రస్థాయిలో ఉన్న అసంతృప్తిని పసిగట్టడంలో డీఎంకే విఫలమవ్వడం, స్టాలిన్ ఓటమికి దారితీసిందని అంటున్నారు. ఈ చారిత్రక ఓటమితో తమిళనాడులో 50 ఏళ్ల ద్రవిడ రాజకీయాల గుత్తాధిపత్యానికి తెరపడి, ఒక నూతన రాజకీయ శకం మొదలైనట్లు విశ్లేషకులు భావిస్తున్నారు. ఇదే సమయంలో డిప్యూటీ సీఎం ఉదయనిధి స్టాలిన్ చెపాక్ అసెంబ్లీ స్థానం నుంచి 4319 ఓట్ల మెజార్టీలో ఉన్నారు.