Iran Oil: అమెరికా, ఇరాన్ మధ్య యుద్ధం ముగిసి, శాంతి వైపు అడుగులు పడుతున్నాయి. ఈ నేపథ్యంలోనే 60 రోజలు పాటు ఇరాన్పై ఉన్న ఆంక్షల్ని అమెరికా ఎత్తేసింది. దీంతో ఇరాన్ మళ్లీ చమురు మార్కెట్లోకి రావడానికి మార్గం ఏర్పడింది. హార్ముజ్ గుండా ఇరాన్ ఆయిల్ ప్రపంచ దేశాలకు చేరేందుకు సిద్ధమైంది. ఇదిలా ఉంటే, ఇరాన్ తమ చమురు కొనుగోలు చేసే బిగ్ ప్లేయర్ల కోసం చూస్తోంది. ముఖ్యంగా, భారత్పై ఇరాన్ ఆశలు పెంచుకుంది. భారత్ ఒప్పుకుంటే డిస్కౌంట్పై చమురు సరఫరా చేసేందుకు ఇరాన్ సిద్ధంగా ఉన్నట్లు మధ్యవర్తుల ద్వారా భారత్కు తెలియజేసింది.
నేషనల్ ఇరానియన్ ఆయిల్ కంపెనీ (NIOC) నేరుగా మరియు మధ్యవర్తుల ద్వారా భారతీయ రిఫైనరీలను సంప్రదించింది. ఇరాన్ తన ముడి చమురుపై బ్యారెల్కు 3-4 డాలర్లు చౌకగా ఇస్తామని భారత కొనుగోలుదారులకు చెబుతోందని రాయిటర్స్ వెల్లడించింది. ప్రస్తుతం ఇరాన్ సంప్రదిస్తున్న వ్యాపారులు సింగపూర్, దుబాయ్లకు చెందిన చిన్న, మధ్య తరహా ట్రేడింగ్ కంపెనీలే అని ఆ నివేదిక వెల్లడించింది.
అయితే, భారత్ ఆగస్టు వరకు తన చమురు సరఫరా దిగుమతుల్ని ముందే ఖరారు చేసుకుంది. దీంతో ఇరాన్ ఆయిల్ను ఇప్పటికిప్పుడు కొనుగోలు చేసే పరిస్థితి లేకుండా పోయింది. రాబోయే కాలంలో అన్ని పరిస్థితులు చక్కబడితే ఇరాన్ నుంచి భారత్ ముడి చమురు, ఎల్పీజీ దిగుమతుల్ని పెంచే అవకాశం ఉంది. భారత్ అనేక దేశాలతో చమురు ఒప్పందాలు చేసుకోవడంతో ఇప్పటికిప్పుడు ఇరాన్ ఆయిల్ కొనుగోలు చేసే పరిస్థితి లేదు. దీనికి తోడు భారత్ వద్ద ఉన్న నిల్వలు కూడా నిండి ఉన్నాయి. దీంతో ఇరాన్ తక్కువ ధరకు ఇస్తామని చెబుతున్న భారత్ కొనలేని పరిస్థితి ఏర్పడింది.