8 High Courts Get New Chief Justices: కేంద్ర ప్రభుత్వం దేశంలోని పలు హైకోర్టుల్లో 8 మంది కొత్త ప్రధాన న్యాయమూర్తులను (Chief Justices) నియమించింది. సుప్రీంకోర్టు కొలీజియం సిఫార్సు చేసిన కొద్ది రోజులకే ఈ నియామకాలు జరగడం గమనార్హం. ఈ మేరకు కేంద్ర న్యాయశాఖ మంత్రి అర్జున్ రామ్ మేఘ్వాల్ ‘ఎక్స్’ వేదికగా వెల్లడించారు. కొత్త నియామకాలతో పట్నా, కలకత్తా, రాజస్థాన్, బాంబే, పంజాబ్-హర్యానా, ఛత్తీస్గఢ్, మధ్యప్రదేశ్, జమ్మూ కశ్మీర్-లడఖ్ హైకోర్టుల్లో ప్రధాన న్యాయమూర్తుల మార్పులు చోటుచేసుకోనున్నాయి.
8 మంది కొత్త చీఫ్ జస్టిస్లు వీరే
1. జస్టిస్ వల్లూరి కామేశ్వర్ రావు
ప్రస్తుతం ఢిల్లీ హైకోర్టు న్యాయమూర్తిగా ఉన్న జస్టిస్ వల్లూరి కామేశ్వర్ రావును పట్నా హైకోర్టు ప్రధాన న్యాయమూర్తిగా నియమించారు.
2. జస్టిస్ రవీంద్ర వి. ఘుగే
బాంబే హైకోర్టుకు చెందిన జస్టిస్ రవీంద్ర వి. ఘుగేను కలకత్తా హైకోర్టు చీఫ్ జస్టిస్గా నియమించారు.
3. జస్టిస్ సంజయ్ కుమార్ అగర్వాల్
ఛత్తీస్గఢ్ హైకోర్టు న్యాయమూర్తి జస్టిస్ సంజయ్ కుమార్ అగర్వాల్ ను రాజస్థాన్ హైకోర్టు ప్రధాన న్యాయమూర్తిగా నియమించారు.
4. జస్టిస్ మహేశ్ చంద్ర త్రిపాఠి
అలహాబాద్ హైకోర్టుకు చెందిన జస్టిస్ మహేశ్ చంద్ర త్రిపాఠిను బాంబే హైకోర్టు చీఫ్ జస్టిస్గా నియమించారు.
5. జస్టిస్ అశ్విని కుమార్ మిశ్రా
పంజాబ్-హర్యానా హైకోర్టు న్యాయమూర్తి జస్టిస్ అశ్విని కుమార్ మిశ్రాను అదే పంజాబ్-హర్యానా హైకోర్టు ప్రధాన న్యాయమూర్తిగా నియమించారు.
6. జస్టిస్ కృష్ణ రామ్ మొహపాత్ర
ఒడిశా హైకోర్టుకు చెందిన జస్టిస్ కృష్ణ రామ్ మొహపాత్రను ఛత్తీస్గఢ్ హైకోర్టు చీఫ్ జస్టిస్గా నియమించారు.
7. జస్టిస్ అల్పేశ్ యశ్వంత్ కోగ్జే
గుజరాత్ హైకోర్టు న్యాయమూర్తి జస్టిస్ అల్పేశ్ యశ్వంత్ కోగ్జేను మధ్యప్రదేశ్ హైకోర్టు ప్రధాన న్యాయమూర్తిగా నియమించారు.
8. జస్టిస్ పుష్పేంద్ర సింగ్ భాటి
రాజస్థాన్ హైకోర్టుకు చెందిన జస్టిస్ పుష్పేంద్ర సింగ్ భాటిను జమ్మూ కశ్మీర్, లడఖ్ హైకోర్టు ప్రధాన న్యాయమూర్తిగా నియమించారు.
సుప్రీంకోర్టు కొలీజియం సిఫార్సుల తర్వాత నియామకాలు
ఈ నియామకాలు సుప్రీంకోర్టు కొలీజియం సిఫార్సుల అనంతరం కేంద్ర ప్రభుత్వం తీసుకున్న నిర్ణయంగా వెల్లడైంది. దేశంలోని పలు హైకోర్టుల్లో ప్రధాన న్యాయమూర్తుల పదవులకు సంబంధించిన మార్పుల్లో భాగంగా ఈ నియామకాలు జరిగాయి. కొత్త చీఫ్ జస్టిస్ల నియామకంతో ఆయా హైకోర్టుల్లో పరిపాలనా వ్యవహారాలు, న్యాయపరమైన బాధ్యతల్లో మార్పులు చోటుచేసుకోనున్నాయి.