Gen Z Travel Trend: కొత్త ట్రెండ్‌గా మారిన ‘రేజ్ బుకింగ్’.. కోపంలో ట్రిప్స్ ప్లాన్ చేస్తున్న యువత.!

సాధారణంగా మనం ఎంతో ప్రశాంతంగా కూర్చుని, సెలవుల కోసం ప్లాన్ చేసుకుని ట్రిప్స్ బుక్ చేసుకుంటాం. కానీ ‘రేజ్ బుకింగ్’ అనేది దీనికి పూర్తిగా భిన్నం. పని ఒత్తిడి, ఆఫీసులో బాస్ విసిగించడం లేదా జీవితంలో ఎదురయ్యే చిరాకుల వల్ల వచ్చే కోపాన్ని తగ్గించుకోవడానికి వెనుకాముందు ఆలోచించకుండా వెంటనే ఏదో ఒక ట్రిప్ బుక్ చేసుకోవడమే ఈ ట్రెండ్ సారాంశం.

అసలు ‘రేజ్ బుకింగ్’ అంటే ఏమిటి?
‘రేజ్’ (Rage) అంటే తీవ్రమైన కోపం. ఉద్యోగంలో విపరీతమైన పని భారం ఉన్నప్పుడు లేదా కెరీర్ పట్ల అసంతృప్తి కలిగినప్పుడు.. ఆ నిరాశ నుంచి బయటపడటానికి యువత వెంటనే ఫ్లైట్ టికెట్లు లేదా హోటల్ రూమ్స్ బుక్ చేసుకుంటున్నారు. “ఇక నా వల్ల కాదు, నాకు బ్రేక్ కావాలి” అనే ఉద్దేశంతో తీసుకునే ఈ తక్షణ నిర్ణయాన్నే రేజ్ బుకింగ్ అని పిలుస్తారు. ఇది ఒక రకమైన ‘ఎమోషనల్ బుకింగ్’.

జెన్-జీ , మిలీనియల్స్ ఎందుకు ఇష్టపడుతున్నారు?

ప్రస్తుత కాలంలో వర్క్-లైఫ్ బ్యాలెన్స్ దెబ్బతినడం దీనికి ప్రధాన కారణం. నిరంతర పని ఒత్తిడి వల్ల కలిగే మానసిక ఆందోళనను తగ్గించుకోవడానికి ప్రయాణమే ఉత్తమ మార్గమని యువత భావిస్తున్నారు. ఏదైనా ట్రిప్ బుక్ చేసిన వెంటనే, మనసుకి ఒక రకమైన ఊరట లభిస్తుంది. ప్రయాణం ఇంకా మొదలవ్వకపోయినా, “నేను వెళ్తున్నాను” అనే ఆలోచనే వారికి సంతోషాన్నిస్తుంది. తమ వ్యక్తిగత జీవితం కంటే ఉద్యోగం గొప్పది కాదని నిరూపించుకోవడానికి కూడా చాలామంది ఇలాంటి నిర్ణయాలు తీసుకుంటున్నారు.

రీవెంజ్ ట్రావెల్ వర్సెస్ రేజ్ బుకింగ్
కరోనా తర్వాత ‘రీవెంజ్ ట్రావెల్’ (Revenge Travel) అనే పదం పాపులర్ అయ్యింది. అంటే లాక్-డౌన్ వల్ల ఇంట్లోనే ఉండిపోయినందుకు ప్రతీకారంగా ఎక్కువ ప్రయాణాలు చేయడం. కానీ ‘రేజ్ బుకింగ్’ అనేది పూర్తిగా మీ వ్యక్తిగత లేదా వృత్తిపరమైన కోపం , నిరాశకు సంబంధించినది. రీవెంజ్ ట్రావెల్ సమయం గురించి అయితే, రేజ్ బుకింగ్ మానసిక స్థితి (Mood) గురించి.

జాగ్రత్తలు అవసరం!
కోపంలో తీసుకునే ఏ నిర్ణయమైనా ఒక్కోసారి ఆర్థిక ఇబ్బందులకు దారితీయవచ్చు. ఆవేశంలో బడ్జెట్‌కు మించిన ట్రిప్స్ బుక్ చేసుకోవడం వల్ల తర్వాత ఇబ్బంది పడే అవకాశం ఉంది. కాబట్టి, బ్రేక్ తీసుకోవడం అవసరమే అయినా, అది మీ జేబుకు చిల్లు పడకుండా చూసుకోవడం ముఖ్యం.