రాబోయే 30 ఏళ్ల వరకు కాంగ్రెస్ అధికారంలోకి రాదని కేంద్ర హోంమంత్రి అమిత్ షా అన్నారు. గురువారం ఢిల్లీ జల్ బోర్డ్‌కు చెందిన రూ.8,941 కోట్ల విలువైన 43 ప్రాజెక్టులను ప్రారంభించి శంకుస్థాపన చేశారు. ఈ సందర్భంగా అమిత్ షా మాట్లాడుతూ.. రాహుల్ గాంధీ విదేశీ టూర్‌పై విమర్శలు గుప్పించారు. ‘‘రాబోయే 30 ఏళ్ల వరకు మీ వంతు రాదు. మీరు ఎక్కడో విదేశాల్లో కూర్చుని ఉన్నారు. నా మాట మీకు వినిపించదని నాకు తెలుసు. మీరు అక్కడ ఎందుకు ఉన్నారో కూడా నాకు చెప్పరు. కానీ అది మీ వ్యక్తిగత జీవితం.’’ అని అన్నారు. ‘‘మీరు ఢిల్లీలో అడుగుపెట్టిన తర్వాత… నా మాట వినండి. రాబోయే 30 ఏళ్ల వరకు మీ వంతు రాదు.’ అని జోస్యం చెప్పారు.
‘‘యమునా నది ఉదాహరణనే తీసుకోండి. మీ పార్టీ 30 ఏళ్లపాటు అధికారంలో ఉంది. కానీ యమునా నదికి మీరు ఏమీ చేయలేదు. నరేంద్ర మోడీ నాయకత్వంలో యమునోత్రి నుంచి సంగమం వరకు యమునా నది మొత్తాన్ని శుభ్రపరిచే అదృష్టం భారతీయ జనతా పార్టీకి దక్కనుంది.’’ అని అన్నారు. చొరబాటుదారులను కాపాడాలనే ఉద్దేశంతోనే రాహుల్ గాంధీ ఓట్ల దొంగతనం ఆరోపణలు చేస్తున్నారని ఆరోపించారు
నిరసనలు, ప్రదర్శనల వల్ల ఏమీ సాధించలేమని అన్నారు. మీరు ఎన్నికైన ప్రాంత ప్రజల కోసం పని చేయాలని సూచించారు. ఈసారి పంజాబ్‌లో ఎన్డీఏనే ప్రభుత్వాన్ని ఏర్పాటు చేయాలని పంజాబ్ ప్రజలు నిర్ణయించుకున్నారని తెలిపారు. భారతీయ జనతా పార్టీ బూత్ కార్యకర్తల నుంచి ప్రధాని మోడీ వరకు కోట్లాది మంది కార్యకర్తలు ప్రజల మధ్య నివసిస్తూ.. వారి బాధలను అర్థం చేసుకుని, వారి సమస్యలను పరిష్కరించడానికి తీవ్రంగా కృషి చేస్తారని అన్నారు.