Aamir Khan: హిందూ మహిళను పెళ్లి చేసుకుంటావా? అమిర్ ఖాన్‌పై ముస్లిం మతగురువు ఆగ్రహం

Aamir Khan: బాలీవుడ్ స్టార్ యాక్టర్ అమిర్ ఖాన్ ఇటీవల తన ప్రియురాలు గౌరీ స్ప్రాట్‌ను పెళ్లి చేసుకున్నారు. అయితే, ఇది అతడికి మూడో వివాహం. ఈ వివాహంపై ఇప్పటికే పలువురు విమర్శలు గుప్పించారు. రాజకీయ నాయకుల నుంచి మత నాయకుల వరకు వివాదాస్పద వ్యాఖ్యలు చేశారు. ఇదిలా ఉంటే, అమిర్ పెళ్లిపై ముస్లిం పర్సనల్ దారుల్ ఇఫ్తా రాయల్ చీఫ్ ముఫ్తీ మౌలానా ఇఫ్రాహిం హుస్సేన్ సంచలన వ్యాఖ్యలు చేశారు. ఇప్పుడు ఆయన చేసిన వ్యాఖ్యలు సోషల్ మీడియాలో వైరల్‌గా మారాయి.

ఇస్లాంలో ముస్లిమేతర మహిళను వివాహం చేసుకోవడం అనుమతించబడదని, అలా చేసిన వారు షరియా చట్టం ప్రకారం దోషులుగా పరిగణించబడతారని మౌలానా ఇఫ్రాహిం హుస్సేన్ పేర్కొన్నారు. ముస్లిమేతర స్త్రీని వివాహం చేసుకోవడం షరియా చట్టానికి విరుద్ధమని అన్నారు. ఇలాంటి నిర్ణయాలు ఇస్లాం బోధనలు, షరియా చట్టానికి విరుద్ధంగా ఉంటాయని చెప్పారు. ఇది ఇస్లాం ప్రతిష్టను దెబ్బతీస్తాయని, సమాజానికి ప్రతికూల సందేశాన్ని పంపుతాయని అన్నారు. ముస్లింలంతా మత బోధనల్ని గౌరవించాలని, ఇలాంటి నిర్ణయాలకు దూరంగా ఉండాలని పిలుపునిచ్చారు.

దీనికి ముందు మహారాష్ట్ర మంత్రి నితేష్ రాణా అమీర్ ఖాన్ జీవితంపై వివాదాస్పద వ్యాఖ్యలు చేశారు. ఆయన లవ్ జిహాద్‌కు పాల్పడుతున్నారని ఆరోపించారు. అమీర్ ఖాన్ దీనికి ముందు 1986లో రీనా దత్తాను తొలిసారిగా వివాహం చేసుకున్నారు. వారు చాలా సంవత్సరాలు కలిసి ఉన్నారు, కానీ 2002లో విడిపోయారు. ఆ తర్వాత ఆమిర్ 2005లో చిత్ర దర్శకురాలు కిరణ్ రావును వివాహం చేసుకున్నారు. వీరిద్దరు 2021లో విడాకులు తీసుకున్నారు.