Gagan Vihari: దేశభక్తి, దైవభక్తి నేపథ్యంలో ‘గాంగేయ’!
‘Gaangeaya’: టి. హేమ కుమార్ రెడ్డి నిర్మిస్తోన్న చిత్రం ‘గాంగేయ’. ఈ సినిమాకు కథ, మాటలు, స్క్రీన్ ప్లే, దర్శకత్వ బాధ్యతలను బి. రామచంద్ర శ్రీనివాస కుమార్ నిర్వర్తిస్తున్నారు. గగన్ విహారి, అవ్యుక్త హీరో హీరోయిన్లుగా నటిస్తున్నారు. ఈ మూవీ షూటింగ్ ను పూజా కార్యక్రమాలతో బుధవారం ప్రారంభించారు. ఈ కార్యక్రమానికి ప్రముఖ దర్శకులు సముద్ర ముఖ్య అతిథులుగా విచ్చేసి, ముహూర్తపు సన్నివేశానికి క్లాప్ కొట్టగా.. సమర్పకులు ఎం. విజయ శేఖర్ రెడ్డి కెమెరా స్విచ్ ఆన్ చేశారు. అనంతరం చిత్ర దర్శకులు మాట్లాడుతూ, ” రామానాయుడు గారిలా కుటుంబ సమేతంగా చూడదగ్గ సినిమాను నిర్మిస్తున్నాం. జాతీయ సమగ్రతను చాటి చెప్పేలా కుల మత బేధాలు లేకుండా మనిషి మనిషిని ప్రేమిస్తేనే శాంతి చేకూరుతుందనే పాయింట్ మీద ఈ సినిమా రాబోతోంది. ఈ చిత్రాన్ని జాతీయ స్థాయిలో ఐదు భాషల్లో నిర్మిస్తున్నాం” అని అన్నారు. నిర్మాత టి. హేమ కుమార్ రెడ్డి మాట్లాడుతూ, ”అందరి సహకారంతో త్వరగా సినిమాను పూర్తి చేయాలని అనుకుంటున్నాం. చాలా మంచి కథతో ఈ సినిమా రాబోతోంది. ఆ సుబ్రహ్మణ్యేశ్వర స్వామి దయ వల్ల సినిమా విజయవంతం అవ్వాలని కోరుకుంటున్నాను” అని అన్నారు.
హీరో గగన్ విహారి మాట్లాడుతూ, ”అన్ని రకాల ఎమోషన్స్తో కూడుకున్న సినిమా ఇది. దైవభక్తి, దేశభక్తి, ప్రేమ.. ఇలా అన్నీ ఈ చిత్రంలో ఉంటాయి. మంచి సినిమాను తీయాలని మా నిర్మాతలు ఎంతో కష్టపడుతున్నారు. మీ అందరి ఆశీర్వాదం మాకు కావాలి” అని అన్నారు. తనకిది తెలుగులో మొదటి చిత్రమని, కథ ఎంతో బాగుందని హీరోయిన్ అవ్యుక్త తెలిపింది.