Trikala : ఏకంగా మూడు OTTలలో త్రికాల స్ట్రీమింగ్

తెలుగులో ఈ మధ్య కాలంలో వచ్చిన మోస్ట్ డిఫరెంట్ మైథలాజికల్ డార్క్ థ్రిల్లర్ ‘త్రికాల’. థియేటర్లలో ప్రేక్షకులను ఆకట్టుకుని మంచి స్పందన తెచ్చుకున్న ఈ చిత్రం, ఇప్పుడు OTTలలో సైతం సంచలనం సృష్టిస్తోంది. ‘A Script of God’ అనే ఆసక్తికరమైన సబ్‌టైటిల్‌తో వచ్చిన ఈ చిత్రం.. ప్రస్తుతం జియో హాట్‌స్టార్, అమెజాన్ ప్రైమ్, సన్‌నెక్ట్స్ వంటి ఏకంగా మూడు ప్రముఖ ఓటీటీ ప్లాట్‌ఫామ్‌లలో ఏకకాలంలో స్ట్రీమింగ్ అవుతూ దుమ్మురేపుతోంది. అన్ని ప్లాట్‌ఫామ్స్‌లోనూ టాప్ రేటింగ్‌తో ట్రెండ్ అవ్వడమే కాకుండా, ప్రముఖ గ్లోబల్ మూవీ డేటాబేస్ ‘ఐఎండీబీ’లో ఏకంగా 9.1 రేటింగ్ అందుకొని టాలీవుడ్‌లో హాట్ టాపిక్‌గా నిలిచింది.

గ్లామరస్ బ్యూటీ శ్రద్ధా దాస్, మహేంద్రన్, విలక్షణ నటుడు అజయ్ ప్రధాన పాత్రల్లో నటించిన ఈ సినిమాను నూతన దర్శకుడు మణి తెల్లగూటి తెరకెక్కించారు. ఈ సినిమా కేవలం రొటీన్ డైలాగులకే పరిమితం కాకుండా.. హిందూ ధర్మంలోని కర్మ సిద్ధాంతం, గో సంరక్షణ ప్రాముఖ్యత, పునర్జన్మల వైవిధ్యాన్ని విజువల్‌గా ఆవిష్కరించి ప్రేక్షకులను ఆకట్టుకున్నారు. పౌరాణికతను నేటి ఆధునిక ప్రపంచంతో మేళవిస్తూ.. మైథాలజీ, సైకాలజికల్ హారర్, డార్క్ ఫాంటసీ అంశాలను అద్భుతంగా సమన్వయం చేసి ఈ సినిమాను ఒక విజువల్ వండర్‌గా మలిచారు దర్శకుడు మణి తెల్లగూటి.