Crime Comedy Movie : మనుషులను బురిడీ కొట్టించే గొర్రెల మంద… హాలీవుడ్ బాక్స్ ఆఫీస్ వద్ద దూసుకుపోతున్న క్రైమ్ కామెడీ

Crime Comedy Movie : పిల్లల నుండి పెద్దల వరకు అందరినీ ఆకట్టుకునే ఒక వినూత్నమైన హాలీవుడ్ మూవీ థియేటర్లలో మంచి టాక్ తో నడుస్తోంది. మిస్టరీ, కామెడీ ఫ్యామిలీ ఎంటర్‌టైనర్ ఎలిమెంట్స్ తో ఈ సినిమా ఆకట్టుకుంటోంది. ఈ మూవీ హాలీవుడ్ క్లాసిక్ సినిమాలైన “బేబ్ (Babe)”, మైండ్ బ్లోయింగ్ ఇన్వెస్టిగేషన్ థ్రిల్లర్ “నైవ్స్ అవుట్’ (Knives Out) తరహాలో సాగుతుంది. ఇందులో ఒక గొర్రెల కాపరి అనుమానాస్పదంగా చనిపోతే, అతని మందలోని తెలివైన గొర్రెలన్నీ కలిసి ఆ మిస్టరీని ఎలా చేదిస్తాయనేదే కథ. అత్యంత ఆధునిక కంప్యూటర్ గ్రాఫిక్స్ తో రూపొందించిన ఈ సినిమా, అటు ఉత్కంఠభరితమైన ఇన్వెస్టిగేషన్ తో పాటు, ఇటు పొట్ట చెక్కలయ్యే కామెడీతోనూ ప్రేక్షకులను విశేషంగా అలరిస్తోంది.

త్వరలోనే ఓటీటీలోకి

ప్రపంచవ్యాప్తంగా 2026 మే 8 థియేటర్లలో విడుదలై భారీ విజయాన్ని అందుకున్న ఈ సినిమా పేరు ‘ది షీప్ డిటెక్టివ్స్’ (The Sheep Detectives). సుమారు $75 మిలియన్ల (రూ. 620 కోట్లకు పైగా) బడ్జెట్‌తో అమెజాన్ MGM స్టూడియోస్ నిర్మించిన ఈ చిత్రం, విడుదలైన కొద్ది రోజుల్లోనే ప్రపంచవ్యాప్తంగా $87.8 మిలియన్లకు పైగా వసూలు చేసి బాక్స్ ఆఫీస్ వద్ద దూసుకుపోతోంది. విమర్శకుల నుండి కూడా ఈ సినిమాకు అద్భుతమైన రెస్పాన్స్ వచ్చింది. ప్రముఖ రివ్యూ వెబ్‌సైట్ రోటెన్ టొమాటోస్‌లో దీనికి 95% రేటింగ్ కూడా లభించింది. థియేటర్ రన్ ముగిసిన తర్వాత ఈ మూవీ అమెజాన్ ప్రైమ్ వీడియో (Amazon Prime Video) ఓటీటీ ప్లాట్‌ఫార్మ్‌లో స్ట్రీమింగ్ కానుంది. టెక్నికల్ గా ఈ సినిమా హాలీవుడ్‌లో ఒక కొత్త మైలురాయిగా నిలిచింది. ఇందులో గొర్రెల పాత్రలను సృష్టించడానికి ఉపయోగించిన కంప్యూటర్ గ్రాఫిక్స్, విజువల్ ఎఫెక్ట్స్ అత్యంత సహజంగా ఉండి ప్రేక్షకులను కట్టిపడేశాయి. రాబోయే ఆస్కార్ అవార్డుల్లో ఈ చిత్రానికి బెస్ట్ విజువల్ ఎఫెక్ట్స్ కేటగిరీలో నామినేషన్ దక్కే అవకాశం ఉందని విశ్లేషకులు భావిస్తున్నారు.

‘ది షీప్ డిటెక్టివ్స్’ సినిమా కథ

ఈ కథ చాలా విచిత్రంగా, సరదాగా సాగుతుంది. ఒక ఊరిలో జార్జ్ అనే గొర్రెల కాపరి ఉండేవాడు. అతనికి తన గొర్రెలంటే ప్రాణం. ప్రతిరోజూ రాత్రి పూట వాటికి రకరకాల డిటెక్టివ్ నవలలు, క్రైమ్ స్టోరీలు చదివి వినిపించేవాడు. అయితే ఆ గొర్రెలన్నీ చాలా తెలివైనవని, అతను చదివే ప్రతి ముక్కా వాటికి అర్థమవుతోందని పాపం ఆ కాపరికి అస్సలు తెలియదు. అలా ఆ గొర్రెల మంద అంతా క్రైమ్ నవలలు వింటూ పెద్ద డిటెక్టివ్ మైండ్స్ లా తయారవుతాయి. అయితే ఒకరోజు హఠాత్తుగా జార్జ్ తన పొలంలోనే అనుమానాస్పద స్థితిలో చనిపోయి కనిపిస్తాడు. పోలీసులు వచ్చి ఇదొక ప్రమాదం అని కొట్టిపారేస్తారు.

అయితే తమ యజమానిని ఎవరో ప్లాన్ ప్రకారం చంపేశారని ఆ గొర్రెలకు అర్థమవుతుంది. దాంతో జార్జ్ కి న్యాయం చేయాలని, హంతకుడిని ఎలాగైనా పట్టుకోవాలని ఆ గొర్రెలన్నీ ఒక టీమ్‌గా ఏర్పడతాయి. తాము విన్న డిటెక్టివ్ కథల నాలెడ్జ్ మొత్తాన్ని ఉపయోగించి కేసు ఇన్వెస్టిగేషన్ మొదలుపెడతాయి. అప్పటివరకు పచ్చటి మైదానాలకే పరిమితమైన ఆ గొర్రెలు, క్లూస్ వెతుక్కుంటూ మొదటిసారి మనుషుల ప్రపంచంలోకి అడుగుపెడతాయి. మనుషుల ప్రవర్తన, వాళ్ళు చెప్పే అబద్ధాలు, వింత అలవాట్లను చూసి అవి షాక్ అవుతాయి కూడా. అయినప్పటికీ వెనకడుగు వేయకుండా.. ఒకదానిని ఒకటి కాపాడుకుంటూ, ఎన్నో నవ్వులు పూయించే సాహసాలు చేసి చివరకు ఆ హంతకుడిని ఎలా పట్టుకున్నాయనేదే ఈ సినిమా పూర్తి కథ.