The Odyssey Ticket Price : సినిమా విడుదలకు ఇంకా సమయం ఉంది. ట్రైలర్ కూడా పూర్తిగా బయటకు రాలేదు. అయినా టికెట్ల కోసం అభిమానులు లక్షల రూపాయలు ఖర్చు పెట్టేందుకు సిద్ధమవుతున్నారు. ఒక సినిమా చుట్టూ ఇంతటి ఉత్సాహం, ఇంతటి అంచనాలు కనిపించడం చాలా అరుదు. ప్రస్తుతం ప్రపంచ సినీ వర్గాల్లో చర్చనీయాంశంగా మారిన చిత్రం ‘ది ఒడిస్సీ’. ప్రముఖ దర్శకుడు Christopher Nolan తెరకెక్కిస్తున్న ఈ చిత్రం విడుదలకు ముందే సంచలనాలు సృష్టిస్తోంది.
ప్రపంచవ్యాప్తంగా సినీ ప్రేమికుల్లో నోలన్కు ఉన్న క్రేజ్ గురించి ప్రత్యేకంగా చెప్పాల్సిన అవసరం లేదు. Inception, The Dark Knight, Interstellar వంటి చిత్రాలతో ఆయన కథ చెప్పే విధానం, విజువల్ ప్రెజెంటేషన్ ప్రపంచవ్యాప్తంగా ప్రత్యేక గుర్తింపు తెచ్చుకున్నాయి. అందుకే ఆయన కొత్త సినిమా ప్రకటించిన ప్రతిసారి ప్రేక్షకుల్లో భారీ ఆసక్తి నెలకొంటుంది. అయితే ‘ది ఒడిస్సీ’ విషయంలో ఆ ఆసక్తి అంచనాలను దాటి వెళ్ళిపోయింది.
హాలీవుడ్ మీడియా కథనాల ప్రకారం ఈ సినిమా టికెట్లు రీసేల్ మార్కెట్లో భారీ ధరలకు అమ్ముడవుతున్నాయి. ముఖ్యంగా కొన్ని ప్రీమియం షోలు, ప్రత్యేక 70ఎంఎం ఐమ్యాక్స్ ప్రదర్శనల టికెట్లు ఆన్లైన్ రీసేల్ ప్లాట్ఫారమ్లలో దాదాపు 1500 డాలర్ల వరకు చేరుకున్నట్లు వార్తలు వినిపిస్తున్నాయి. భారతీయ కరెన్సీలో ఇది సుమారు లక్షా నలభై వేల రూపాయలకు సమానం. ఒక సినిమా టికెట్ కోసం ఇంత మొత్తం చెల్లించేందుకు అభిమానులు సిద్ధపడటం ఈ ప్రాజెక్ట్పై ఉన్న అంచనాలను స్పష్టంగా చూపిస్తోంది.
ఈ హైప్కు ప్రధాన కారణాల్లో ఒకటి సినిమా నిర్మాణ విధానం. ‘ది ఒడిస్సీ’ను పూర్తిగా ఐమ్యాక్స్ కెమెరాలతో చిత్రీకరించినట్లు సమాచారం. ముఖ్యంగా 70ఎంఎం ఐమ్యాక్స్ స్క్రీన్లపై ఈ చిత్రాన్ని చూడటం ఒక ప్రత్యేక అనుభూతిని అందిస్తుందని సినీ వర్గాలు చెబుతున్నాయి. నోలన్ సినిమాలను పెద్ద తెరపై చూడటమే అసలైన అనుభవమని భావించే అభిమానులు ఈ అవకాశాన్ని మిస్ కావాలని అనుకోవడం లేదు. ఇక ఈ చిత్రంలో మ్యాట్ డామన్, టామ్ హాలండ్, ఆన్ హాత్వే, రాబర్ట్ ప్యాటిన్సన్, జెండయా, ఛార్లిజ్ థెరాన్ లాంటి హేమాహేమీలు నటిస్తున్నారు. వంటి ప్రముఖ తారలు నటిస్తున్నారు. ఈ స్టార్ కాస్ట్ కూడా సినిమాపై ఆసక్తిని మరింత పెంచుతోంది.
ప్రస్తుతం ప్రపంచ సినీ అభిమానులు ఆసక్తిగా ఎదురుచూస్తున్న ఈ చిత్రం జూలై 17న భారీ స్థాయిలో విడుదల కానుంది. విడుదలకు ముందే ఇంతటి సంచలనం సృష్టిస్తున్న ‘ది ఒడిస్సీ’ థియేటర్లలోకి వచ్చిన తర్వాత ఎలాంటి రికార్డులు సృష్టిస్తుందో చూడాలనే ఆసక్తి సినీ ప్రపంచమంతటా నెలకొంది.