The Kerala Story 2: “ది కేరళ స్టోరీ 2’కు సెన్సార్ షాక్: ఏకంగా 16 కట్స్!

వివాదాస్పద అంశాలతో దేశవ్యాప్తంగా సంచలనం సృష్టించిన ‘ది కేరళ స్టోరీ’ చిత్రానికి సీక్వెల్‌గా వస్తున్న ‘ది కేరళ స్టోరీ 2’ సెన్సార్ కార్యక్రమాలను పూర్తి చేసుకుంది. అయితే, థియేటర్లలోకి రావడానికి ఈ సినిమాకు సెన్సార్ బోర్డ్ (CBFC) గట్టి షాక్ ఇచ్చింది. సినిమాలో ఉన్న పలు అభ్యంతరకర దృశ్యాలపై కత్తెర వేయడంతో పాటు, ఏకంగా 16 మార్పులు చేస్తేనే అనుమతిస్తామని తేల్చి చెప్పింది. సెన్సార్ బోర్డ్ ఈ చిత్రానికి ‘U/A 16+’ సర్టిఫికేట్‌ను జారీ చేసింది. కానీ ఈ ప్రక్రియలో మేకర్స్‌కు చుక్కలు కనిపించాయి. ముఖ్యంగా హింస మరియు అసభ్యకరంగా ఉన్న సీన్లపై బోర్డ్ తీవ్ర అభ్యంతరం వ్యక్తం చేసింది. సినిమాలో ఉన్న ఒక ముద్దు సీన్‌ను ఏడు సెకన్ల పాటు తగ్గించాలని ఆదేశించింది. అలాగే లైంగిక వేధింపులు, అత్యాచారాలకు సంబంధించిన దృశ్యాలను సగానికి పైగా కత్తిరించింది. మహిళలపై భౌతిక దాడులు, చెంపదెబ్బలు కొట్టే సీన్లను కూడా కొన్ని సెకన్ల మేర తగ్గించారు.

Also Read:Virosh: ఒకేరోజు రెండు సార్లు పెళ్లి చేసుకోనున్న విజయ్ – రష్మిక

ఒక ఇంటిని బుల్డోజర్‌తో కూల్చివేసే సన్నివేశంలో కూడా మార్పులు చేయాలని బోర్డ్ సూచించింది. వీటితో పాటు కొన్ని వివాదాస్పద డైలాగులను మ్యూట్ చేయడం లేదా పూర్తిగా తొలగించడం జరిగింది. సినిమా ప్రారంభంలో దాదాపు రెండు నిమిషాల నిడివి గల సుదీర్ఘ డిస్క్లైమర్‌ను వాయిస్ ఓవర్‌తో సహా ప్రదర్శించాలని బోర్డ్ ఆదేశించింది. ఇది యదార్థ సంఘటనల ఆధారంగా రూపొందించిన కథ అని చెప్పడంతో పాటు, తాము చూపిస్తున్న అంశాలు నిజమేనని నిరూపించే స్క్రిప్ట్ ఆధారాలను కూడా మేకర్స్ సెన్సార్ బోర్డుకు సమర్పించాల్సి వచ్చింది. ఈ మార్పులు చేర్పుల తర్వాత ‘ది కేరళ స్టోరీ 2’ తుది నిడివి 2 గంటల 11 నిమిషాలుగా ఖరారైంది. మొదటి భాగం లాగే ఈ సీక్వెల్ కూడా బాక్సాఫీస్ వద్ద ప్రకంపనలు సృష్టిస్తుందో లేదో చూడాలి. అన్ని అడ్డంకులను దాటుకుని ఈ చిత్రం ఈ నెల ఫిబ్రవరి 27, 2026న ప్రేక్షకుల ముందుకు రాబోతోంది.