Sharwanand: శర్వానంద్, రీతూ వర్మ, జంటగా శ్రీ కార్తీక్ దర్శకత్వంలో తెరకెక్కిన చిత్రం ఒకే ఒక జీవితం. అమల అక్కినేని ఈ సినిమాతో మరోసారి రీ ఎంట్రీ ఇస్తోంది. వెన్నెల కిషోర్, ప్రియదర్శి కీలక పాత్రలు పోషించిన ఈ సినిమాను డ్రీమ్ వారియర్ పిక్చర్స్ ప్రతిష్టాత్మకంగా నిర్మిస్తోంది. ఇక ఈ సినిమా సెప్టెంబర్ 9 న ప్రేక్షకుల ముందుకు రానుంది. ఈ నేపథ్యంలోనే ఈ సినిమా ప్రీ రిలీజ్ ఈవెంట్ ను నేడు ఎన్ కన్వెన్షన్ లో గ్రాండ్ నిర్వహించారు. ఈ వేదికపై శర్వానంద్ మాట్లాడుతూ.. అమ్మ గురించి ఎంత చెప్పినా తక్కువే అవుతుందని, ఈ సినిమాలో పనిచేసిన ప్రతి ఒక్కరు తామే హీరో అనుకోని పనిచేశారని చెప్పుకొచ్చాడు. ఒక ప్రపంచం నుంచి మరో ప్రపంచానికి ప్రేక్షకుడును తీసుకెళ్లడానికి చాలా కష్టపడ్డామని తెలిపాడు. అమల గారితో వర్క్ చేయడం తనకు కష్టంగా అనిపించలేదని, తన అమ్మతో పనిచేసినట్లే అనిపించిందని అన్నాడు.
ఇక ప్రియదర్శి, వెన్నెల కిషోర్ ఈ సినిమాలో ముఖ్యపాత్రలు చేశారని తెలిపిన శర్వా ప్రియదర్శి కి థాంక్స్ చెప్తూ ప్రమోషన్స్ కు రాలేదని కిషోర్ పై ఫన్నీగా కోపం చూపించాడు. వాడు ప్రమోషన్స్ కు రమ్మంటే రాలేదు. వాడికి సినిమా ఇప్పించింది నేనే.. వాడి సంగతి వచ్చాకా చెప్తా అంటూ నవ్వులు పూయించాడు. ఇక ఈ సినిమాను రీతూ ఒప్పుకున్నందుకు థాంక్స్. పాత్ర ఏంటి..? సీన్స్ ఉన్నాయా..? సాంగ్స్ ఉన్నాయా..? లాంటివి ఏమి అడగకుండా ఇలాంటి కథలో చిన్న భాగమైతే చాలు అనుకోని చేసిందని తెలిపాడు. సినిమాను తామందరం కథను నమ్మి చేశామని, దర్శకుడు శ్రీ కార్తీక్ చెప్పిన విధానం తనకు నచ్చిందని తెలిపాడు. మీ అందరికి ప్రామిస్ చేసి చెప్తున్నా.. గర్వంగా చెప్తున్నా.. ఒక మంచి సినిమాను ప్రేక్షకులకు ఇస్తున్నాం అని చెప్పిన శర్వా కరోనా పాండమిక్, తనకు యాక్సిడెంట్ అయినా నిర్మాతలు పర్వాలేదని, మంచిగా సపోర్ట్ చేశారని చెప్పుకొచ్చాడు. ఈ సినిమాను ప్రేక్షకులు ఆదరిస్తారని నమ్ముతున్నాం అంటూ ముగించాడు.
