Save the Tigers : టైగర్స్ వేటలో బిగ్ ట్విస్ట్.. సీజన్ 4లోకి టాలీవుడ్ స్టార్ హీరో

తెలుగు ఓటీటీ రంగంలో క్లీన్ ఫ్యామిలీ ఎంటర్‌టైన్‌మెంట్‌తో సరికొత్త హిస్టరీ క్రియేట్ చేసిన మోస్ట్ సక్సెస్‌ఫుల్ వెబ్ సిరీస్ ‘సేవ్ ది టైగ‌ర్స్‌’. ఇప్పటికే రిలీజైన మూడు సీజన్లు డిజిటల్ ఆడియన్స్‌ను అలరించగా.. ఇప్పుడు మేకర్స్ అంతకుమించిన భారీ ప్లాన్‌తో నాలుగో సీజన్‌ను పట్టాలెక్కించడానికి సన్నాహాలు షురూ చేశారు. ఇటీవలే జూన్ 19న విడుదలైన ‘సేవ్ ది టైగర్స్’ సీజన్ 3 ప్రముఖ ఓటీటీ ప్లాట్‌ఫార్మ్ జియో హాట్‌స్టార్‌లో స్ట్రీమింగ్ అయి, తొలి రెండు సీజన్ల పంథాలోనే మంచి టాక్ తెచ్చుకుంది. ఈ సిరీస్ హ్యాట్రిక్ సక్సెస్‌తో షో రన్నర్ మహి వి. రాఘవ్ ఫుల్ ఖుషీగా ఉన్నారు. ఇక ఇప్పుడు సీజన్ 4ను మరింత గ్రాండియర్‌గా ప్లాన్ చేస్తున్నారు. అయితే ఈ నాలుగో భాగంలో టాలీవుడ్‌కు చెందిన ఒక స్టార్ హీరోను రంగంలోకి దించడానికి గట్టి ప్రయత్నాలు జరుగుతుండటం ఇప్పుడు ఇండస్ట్రీలో హాట్ టాపిక్‌గా మారింది.

నిరంతరం గొడవలు పడే ఆ ముగ్గురు మొగుళ్లు, పెళ్లాల మధ్యలోకి ఈ స్టార్ హీరో క్యారెక్టర్ ఎలా ఎంట్రీ ఇస్తుంది? ఆయన పాత్ర సిరీస్‌ను ఏ మలుపు తిప్పబోతోంది? అనే ఆసక్తి నెటిజన్లలో ఇప్పుడే పీక్స్‌కు చేరింది. ప్రస్తుతం సదరు స్టార్ హీరోతో మేకర్స్ చర్చలు జరుపుతున్నారు. ప్రేక్షకుల నుండి లభించిన అద్భుతమైన ఆదరణను కాపాడుకుంటూ, నాలుగో సీజన్‌తోనూ అదే సక్సెస్ గ్రాఫ్‌ను కంటిన్యూ చేసేలా స్క్రిప్ట్ విషయంలో రైటర్స్ ప్రత్యేక జాగ్రత్తలు తీసుకుంటున్నారు. కథలో ఎక్కడా హ్యూమర్ మిస్ కాకుండా, భారీ తారాగణంతో ఈ ప్రాజెక్ట్‌ను మరింత గ్రాండ్‌గా తెరకెక్కించబోతున్నారు. ఈ క్రేజీ సీజన్ 4కి సంబంధించిన మరిన్ని అధికారిక వివరాలను, ఆ స్టార్ హీరో ఎవరనే సస్పెన్స్‌ను మేకర్స్ త్వరలోనే రివీల్ చేయనున్నారు.