Jailer 2: రజనీకాంత్ ‘జైలర్ 2’కు టాలీవుడ్ సినిమాల సెగ.. రిలీజ్ డేట్ మారుతుందా?

Jailer 2: సూపర్‌స్టార్ రజనీకాంత్ నటిస్తున్న ‘జైలర్ 2’  2026 అక్టోబర్ 15 విడుదల కానుందని మేకర్స్ ప్రకటించిన విషయం తెలిసిందే. అయితే దసరా బరిలో దిగుతున్న టాలీవుడ్ భారీ సినిమాల పోటీ కారణంగా, ఈ సినిమాను వాయిదా వేసే యోచనలో మేకర్స్ ఉన్నట్లు ప్రచారం జరుగుతోంది. 2023 లో రజనీకాంత్ హీరోగా నెల్సన్ దిలీప్‌కుమార్ దర్శకత్వంలో వచ్చిన ‘జైలర్’ తెలుగు రాష్ట్రాల్లోనూ భారీ విజయాన్ని అందుకుంది. దీంతో సీక్వెల్ ‘జైలర్ 2’పై తెలుగులో కూడా మంచి అంచనాలు ఉన్నాయి. ఈ నేపథ్యంలో అక్టోబర్ 15న ఈ మూవీ వస్తే తెలుగు సినిమాల నుంచి వచ్చే పోటీ తట్టుకుంటుందా అనేదే ఇప్పుడు సినీ వర్గాలలో కొత్త చర్చకు తెరలేపుతోంది.

ఇప్పటికే విజయ్ దేవరకొండ, రష్మిక మందన్న జంటగా నటిస్తున్న ‘రణబాలి’ అక్టోబర్ 16న విడుదల కానున్నట్లు ప్రకటించారు. మైత్రీ మూవీ మేకర్స్ నిర్మిస్తున్న ఈ సినిమాపై కూడా మంచి అంచనాలు ఉన్నాయి. మరోవైపు వెంకటేష్, త్రివిక్రమ్ శ్రీనివాస్ కాంబినేషన్‌లో తెరకెక్కుతున్న ‘ఏకే 47’ కూడా అక్టోబర్ 16 తేదీని పరిశీలిస్తున్నట్లు సమాచారం. ఈ సినిమా అక్టోబర్ 9న విడుదల చేయాలనే ఆలోచనలో ఉన్నప్పటికీ, ఆ తేదీ వర్కౌట్ కాకపోతే అక్టోబర్ 16ను ప్రత్యామ్నాయంగా ఎంచుకునే అవకాశం ఉందని తెలుస్తోంది. ఇక్కడే ‘జైలర్ 2’ రిలీజ్ డేట్‌పై ఆసక్తికరమైన పరిస్థితి ఏర్పడింది. ఒకవేళ రజనీకాంత్ సినిమా అక్టోబర్ 15న విడుదలైతే, అక్టోబర్ 16న రెండు ప్రధాన తెలుగు సినిమాలు థియేటర్లలోకి రావడం పెద్ద పోటీకి దారితీయొచ్చు. ముఖ్యంగా రజనీకాంత్‌కు తెలుగు రాష్ట్రాల్లో ఉన్న స్టార్‌డమ్‌ను తక్కువగా అంచనా వేయలేం. ‘జైలర్’ తెలుగు వెర్షన్‌కు వచ్చిన స్పందనతో పాటు రజనీ సినిమాలకు ఉన్న ప్రత్యేకమైన క్రేజ్ కారణంగా సీక్వెల్‌కు కూడా భారీ ఓపెనింగ్స్ వచ్చే అవకాశం ఉంది.

అందుకే ‘జైలర్ 2’ అక్టోబర్ 15న వస్తే, మరుసటి రోజే భారీ తెలుగు సినిమాలను విడుదల చేయడం నిర్మాతలకు ఎంతవరకు లాభదాయకమనే ప్రశ్న తలెత్తుతోంది. థియేటర్ల సంఖ్య, షోలు వంటి అంశాల్లో మూడు సినిమాలు ఒకదానిపై ఒకటి ప్రభావం చూపే అవకాశం ఉంటుంది. ఇది ఇలా ఉంటే ధనుష్, మమ్ముట్టి ప్రధాన పాత్రల్లో రాబోతున్న క్రేజీ యాక్షన్ డ్రామా కూడా ‘ఓమ్’ (Om) కూడా అక్టోబర్ 15నే పోటీకి దిగుతోంది. ఈ మూవీ కూడా ‘జైలర్ 2’కి తలనొప్పిగా మారే అవకాశం కనిపిస్తోంది. రజనీకాంత్ ‘జైలర్ 2’, విజయ్ దేవరకొండ ‘రణబాలి’, వెంకటేష్ ‘ఏకే 47’, ధనుష్ ‘ఓమ్’ వంటి భారీ చిత్రాలు ఒకే వారాంతం చుట్టూ పోటీ పడే పరిస్థితి వస్తే బాక్సాఫీస్ లెక్కలు మరింత ఆసక్తికరంగా మారతాయి. అయితే ‘జైలర్ 2’ అక్టోబర్ 15న విడుదలవుతుందా లేదా అన్నది రాబోయే రోజుల్లో వచ్చే ప్రకటనలే ఈ బిగ్ క్లాష్‌పై పూర్తి స్పష్టత ఇవ్వనున్నాయి.