Darling Re-release: రీ-రిలీజ్‌లో ‘డార్లింగ్’ విధ్వంసం.. మైండ్ బ్లాకింగ్ కలెక్షన్స్!

యంగ్ రెబల్ స్టార్ ప్రభాస్ క్రేజ్ గురించి ప్రత్యేకంగా చెప్పక్కర్లేదు. ఆయన కొత్త సినిమాలే కాదు పాత సినిమా థియేటర్లలోకి వచ్చినా బాక్సాఫీస్ షేక్ అవ్వాల్సిందే. తాజాగా ప్రభాస్ కెరీర్‌లోనే క్లాసిక్ లవ్ స్టోరీగా నిలిచిన ‘డార్లింగ్’ సినిమా రీ-రిలీజ్ అయ్యి బాక్సాఫీస్ వద్ద ప్రకంపనలు సృష్టిస్తోంది. చాలా కాలం తర్వాత బిగ్ స్క్రీన్ మీద ప్రభాస్ లవర్ బాయ్ లుక్‌ని చూసేందుకు ఫ్యాన్స్ ఎగబడ్డారు. నిన్నటి లిమిటెడ్ ప్రీమియర్స్ నుంచే ఈ సినిమా తన ప్రతాపాన్ని చూపించడం మొదలుపెట్టింది. నిన్న కేవలం ట్రాక్ చేసిన సెంటర్ల నుండే దాదాపు ₹20 లక్షల గ్రాస్ వసూలు కాగా, అసలైన ఆట ఈరోజు మొదలైంది.

ఈరోజు థియేటర్ల వద్ద పండగ వాతావరణం నెలకొంది. కేవలం మధ్యాహ్నం 3 గంటల సమయానికే ఆన్‌లైన్ ట్రాక్డ్ గ్రాస్ ₹3 కోట్ల మార్కును దాటేసింది. రీ-రిలీజ్ సినిమాల చరిత్రలోనే ఇది అత్యుత్తమ ఓపెనింగ్స్‌లో ఒకటిగా నిలవనుంది. సాయంత్రం, రాత్రి షోలకు బుకింగ్స్ భారీగా ఉండటంతో, మొదటి రోజు ముగిసేసరికి ఈ నంబర్ ఇంకా పెద్దదిగా ఉండే అవకాశం ఉంది. ప్రభాస్ వింటేజ్ లుక్, కరుణాకరన్ మార్క్ టేకింగ్, మరియు జివి ప్రకాష్ మ్యూజిక్ థియేటర్లలో మళ్ళీ మ్యాజిక్ చేస్తున్నాయి. ముఖ్యంగా థియేటర్ల వద్ద ఫ్యాన్స్ చేస్తున్న హంగామా సోషల్ మీడియాలో వైరల్ అవుతోంది. ప్రస్తుత ట్రెండ్ చూస్తుంటే, ‘డార్లింగ్’ రీ-రిలీజ్ మరిన్ని కొత్త రికార్డులను సృష్టించడం ఖాయంగా కనిపిస్తోంది.