Pooja Hegde: దాని నుంచి బయటపడటానికి సమయం పడుతుంది : పూజా హెగ్డే

అనతి కాలంలోనే  స్టార్ హీరోయిన్‌గా తనకంటూ మంచి గ్రాఫ్ సంపాదించుకుంది పొడుగుకాళ్ల సుందరి పూజ హెగ్డె. నాగ చైతన్యతో ‘ఒక లైలా కోసం’ సినిమాతో మొదలు పెట్టి చివరగా వచ్చిన ‘రాధే శ్యామ్’ వరకు ఈ అమ్మడు తన నటనతో అందంతో ప్రేక్షకులను కట్టిపడేసింది. కానీ గత కొంత కాలంగా పూజా హెగ్డేకు బ్యాడ్ టైం నడుస్తుంది. భాషతో సంబంధం లేకుండా సినిమాలు చేస్తున్నప్పటకి సరైన హిట్ మాత్రం లేదు. చేసిన సినిమాలన్నీ దారుణంగా నిరాశపరిచాయి. ఒక్క భాషలో కాదు ఆమె నటించిన అన్ని భాషల సినిమాలు డిజాస్టర్ అయ్యాయి. ప్రస్తుతం ఆమె బాలీవుడ్ లో ‘దేవా’ మూవీలో నటించింది. షాహిద్ కపూర్ హీరోగా నటించిన ఈ మూవీ విడుదలకు సిద్ధంగా ఉంది. ఈ సందర్భంగా ప్రమోషన్ లో భాగంగా ఓ ఇంటర్వ్యూలో పాల్గొన్న పూజ తన సిని ప్రయాణం గురించి ఇంట్రెస్టింగ్ విషయాలు పంచుకుంది..

పూజా హెగ్డే మాట్లాడుతూ..‘ నాకు ఇండస్ట్రీలో ఎలాంటి బంధుప్రీతి లేదు. నా తల్లిదండ్రులు న్యాయవాదులు. మా తమ్ముడు ఆర్థోపెడిక్ సర్జన్. ఇలాంటి కుటుంబంలో పుట్టిన నేను హీరోయిన్ అవుతానని అనుకోలేదు. నా కెరీర్లోనే ఊహకందని విషయం ఇది. కనీసం నటి కావాలని కూడా ఎప్పుడు కోరుకోలేదు. కానీ అనుకోకుండా ఈ సినీ ప్రపంచం లోకి రావడం ఆనందంగా ఉంది. చిత్రపరిశ్రమకు వచ్చి దాదాపు దశాబ్దం గడిచింది. ఎంతో మంది అద్భుతమైన చిత్ర నిర్మాతలు, నటి నటులతో కలిసి పనిచేశాను. నటిగా నేను చాలా దూరం వచ్చాను.. కానీ ప్రయాణించాల్సింది ఇంకా ఉంది. నేను ఎప్పుడు సినిమాల విషయంలో ఒత్తిడిగా ఫీలవ్వను. అలాగే నటనలో నేను ‘స్విచ్ ఆన్ అండ్ ఆఫ్’ అనేది కూడా నేర్చుకోలేదు. ఎందుకంటే కొన్ని పాత్రలు ఇప్పటికీ నాతోనే ఉన్నట్టు అనిపిస్తుంది. అందులో భావోద్వేగాలు ఉంటే ఆ పాత్రకు ఎక్కువ కనెక్ట్ అవుతా. ‘రాధే శ్యామ్’, ‘రెట్రో’ లాంటి సినిమాల్లో నేను పోషించినవి అలాంటి పాత్రలే. కొన్నిసార్లు మనం ఎంచుకున్న పాత్రల నుండి బయటపడడానికి సమయం పడుతుంది. అందుకే నా దగ్గర స్విచ్ ఆన్ అండ్ ఆఫ్ బటన్ లేదు’ అంటూ చెప్పుకొచ్చింది పూజా హెగ్డే .